صوبہ سنکیانگ میں داڑھی رکھنے پر سزائے قید

ایک اطلاع کے مطابق چین میں ایک مسلمان شخص کو داڑھی رکھنے پر چھ سال کی سزائے قید اور اس کی اہلیہ کو سکارف اوڑھنے پر دو سال قید کی سزا سنادی گئی ہے۔
روزنامہ ”چائنا یوتھ ڈیلی“ نے لکھا ہے کہ صوبہ سنکیانگ کے شہر کاشغر سے تعلق رکھنے والے ایک 38 سالہ شخص اور اس کی اہلیہ کو شرپسند اور عوام کے امن کے لئے خطرہ قراردیتے ہوئے ایک متنازعہ قانون کے زیر تحت سزا صادر کی گئی ہے۔ یہ بھی واضح کیا گیا ہے کہ مذکورہ شخص کو داڑھی رکھنے اور اس کی اہلیہ کو اسکارف اوڑھنے پر بار ہا انتباہ دیا گیا تھا۔ تاہم اس انتباہ کی پرواہ نہ کرتے ہوئے اپنی مذہبی روایات پر عمل پیرا رہنے پر ان کے خلاف عدالتی کاروائی کرتے ہوئے سزا صادر کی گئی ہے۔
صوبہ سنکیانگ میں داڑھی، نقاب اور حجاب کے خلاف بھرپور مہم چلائی جارہی ہے اور ”پراجیکٹ بیوٹی“ نامی مہم کے تحت خواتین کو ترغیب دی جاتی ہے کہ وہ حجاب پہننا ترک کردیں اور اپنے سر اور چہرے کو پردے سے آزاد رکھیں۔ واضح رہے کہ حکومت چین کئی دہائیوں سے صوبہ سنکیانگ کی مسلمان دویگر آبادی کو شدت پسندی میں ملوث قرار دیتی آئی ہے اور ایک طویل عرصے سے ان کے خلاف سخت ترین اقدامات کئے جارہے ہیں۔