برازیل بدستور بارشوں اور سیلاب کی آفت سے دو چار

برازیل کے شمال مشرق میں ریاست باہیا میں شدید بارشوں سے آنے والی سیلابی تباہی میں ہلاکتوں کی تعداد 26 ہو گئی جبکہ سیلاب سے متاثرہ شہریوں کی تعداد 715,000  تک ہے۔

باہیا سٹیٹ سول ڈیفنس اینڈ پروٹیکشن اوور سائیٹ  کی طرف سے دیے گئے بیان میں بتایا گیا ہے کہ باہیا کے جنوب میں بیلو کیمپو شہر میں ایک اور شخص کی موت واقع ہو گئی۔

بیان میں کہا گیا ہے کہ سیلاب کے باعث 30 ہزار 915 افراد بے گھر ہوئے، 62 ہزار 731 افراد کو نقل مکانی کرائی گئی، سیلاب سے متاثرہ افراد کی تعداد 7 لاکھ 15 ہزار 634 ہوگئی۔

15 ملین سے زائد آبادی والی ریاست میں سیلاب سے 166 شہر متاثر ہوئے اور 154 شہروں میں ہنگامی حالت کا اعلان بدستور جاری ہے۔

برازیل کے صدر بولسونارو نے یکم جنوری کو اعلان کیا تھا کہ سیلاب سے متاثرہ علاقوں کے لیے 700 ملین برازیلین ریال  کے امدادی قرضے جاری کیے گئے  ہیں۔

برازیل کے شمال مشرق میں واقع ریاست باہیا کے جنوب میں دو ہفتے قبل شدید بارشوں سے  پیدا ہونےوالے سیلاب کی تباہ کاریوں میں 37 شہروں  کے زیرِ آب  آنے کا اعلان کیا گیا تھا۔