امریکہ جوہری معاہدے سے باہر نہ نکلے ورنہ جنگ چھڑجائے گی: اقوام متحدہ

اقوام متحدہ کے سیکریٹری  جنرل انتونیو گویٹرش نے امریکہ پر زور دیا ہے کہ وہ ایران سے کیے جانے والے بین الاقوامی جوہری معاہدے سے باہر نہ نکلے۔

سیکریٹری جنرل گویٹرش نے بی بی سی  سے بات کرتے ہوئے خبردار کیا کہ اگر معاہدہ باقی نہ رہا تو اس صورت میں جنگ کا خطرہ ہو سکتا ہے۔

 انھوں نے کہا کہ 2015 میں ایران اور چھ عالمی طاقتوں کے درمیان ہونے والے معاہدے کو  اس وقت تک ختم نہیں کیا جانا چاہیے جب تک اس سے بہتر متبادل سامنے نہیں آتا ہے۔

 واضح رہے کہ امریکی صدر ڈونلڈ ٹرمپ جو سابق امریکی صدر براک اوباما کے دور میں کیے جانے والے اس معاہدے کے ناقد ہیں اور اس معاہدے کوپاگل پن قرار دے چکے ہیں وہ آنے والے ہفتوں میں یہ فیصلہ کرنے والے ہیں کہ امریکہ 2015 میں ہونے والے اس معاہدے میں شامل رہے یا نہیں۔

دوسری جانب یورپی ممالک کے رہنما صدر ٹرمپ کو قائل کرنے کی کوشش کر رہے ہیں کہ وہ جوہری معاہدے کو منسوخ نہ کریں۔

 فرانس، برطانیہ اور جرمنی نے اتفاق کیا تھا کہ موجودہ جوہری معاہدہ ایران کو جوہری  اسلحہ  تیار کرنے سے روکنے کا بہترین طریقہ ہے۔