ٹرمپ کے داماد نے روسی حکام سے ملاقاتوں کا دعوی مسترد کر دیا
امریکی صدر ڈونالڈ ٹرمپ کے داماد جیرڈ کُشنر نے کہا ہے کہ گزشتہ سال کی صدارتی انتخامی مہم کے دوران وہ چار بار روسی اہلکاروں سے ملے تھے لیکن اُن کے یا اور دیگرغیر ملکی حکومت کے ساتھ کسی قسم کی گٹھ جوڑ کا الزام درست نہیں
امریکی صدر ڈونالڈ ٹرمپ کے داماد اور اُن کے قریبی مشیر، جیرڈ کُشنر نے کہا ہے کہ گزشتہ سال کی صدارتی انتخامی مہم کے دوران اور بعد میں، وہ چار بار روسی اہلکاروں سے ملے تھے لیکن اُن کے ساتھ یا اور دیگر کسی غیر ملکی حکومت کے ساتھ کسی قسم کی گٹھ جوڑ کا الزام درست نہیں۔
سینیٹ خفیہ کمیٹی کے روبرو بند کمرے میں کارروائی سے قبل، کُشنر نے گزشتہ روز 11 صفحات پر مشتمل بیان جاری کیا، جب کہ وہ آج ایوانِ نمائندگان کی خفیہ کمیٹی کے سامنے پیش ہوں گے۔
امریکی کانگریس کے دونوں ایوانوں کی کمیٹیاں گزشتہ سال کے امریکی انتخابات میں مبینہ روسی مداخلت کے معاملے کا جائزہ لے رہی ہیں۔
کُشنر نے تحریری جواب دیا کہ ریکارڈ اور دستاویز جو میں پیش کر رہا ہوں یہ ثابت کریں گے کہ انتخابی مہم اور عبوری دور کے دوران مختلف افراد سے ہزاروں رابطوں میں سے شاید میں چار مرتبہ روس کے نمائندوں کے ساتھ ملا جن میں سے کوئی بھی ملاقات کسی طور پر یاد رکھنے کے قابل نہیں تھی ۔
اُنھوں نے مزید بتایا کہ امریکہ میں روس کے سفیر کے ساتھ اُن کی متعدد مختصر ملاقاتیں ہوئیں، جس دوران اُنھوں نے امریکہ روس تعلقات میں بہتری لانے کی خواہش کا اظہار کیا لیکن اُنھوں نے ذرائع ابلاغ میں آنے والی اِن رپورٹوں کی تردید کی کہ اُن کے اور سرگی کسلیاک کے درمیان ٹیلی فون پر مزید گفتگو جاری رہی۔
