پرتگال  میں  جنگل  کی آگ بے قابو،63  افراد ہلاک، ہزاروں زخمی اور بے گھر

اتوار کے روز پرتگال کے جنگل میں لگنے والی آگ پر اب تک قابو نہیں پایا جاسکا ہے ۔

اتوار کے روز پرتگال کے  پیدروگاؤ گراندے کے جنگل میں لگنے والی آگ پر اب تک قابو نہیں پایا جاسکا ہے جس کے نتیجے میں اب تک 63 افراد ہلاک ہوچکے ہیں جبکہ زخمی اور بے گھر ہونے والوں کی تعداد ہزاروں میں ہے۔

مقامی پولیس کے مطابق اتوار کے روز بجلی کے تار میں اسپارک کے باعث ایک خشک درخت نے آگ پکڑ لی جو دیکھتے ہی دیکھتے آس پاس کی آبادی اور گھنے جنگل تک پھیل گئی۔

آگ کا پھیلاؤ اتنا تیز تھا کہ علاقے سے فرار ہونے کی کوشش کرنے والے کئی لوگ اپنی گاڑیوں ہی میں پھنس جانے کے بعد جھلس کر ہلاک ہوگئے۔ اس واقعے پر گہرے دکھ کا اظہار کرتے ہوئے پرتگالی وزیراعظم انتونیو کوستا نے کہا کہ یہ آگ اس قدر شدید تھی کہ انہیں اپنے ہوش و حواس میں ایسا درد ناک انسانی المیہ یاد نہیں۔

آگ کی شدت کے پیش نظر دیگر علاقوں سے  بھی فائر بریگیڈ کی گاڑیاں اور  خصوصی ہیلی کاپٹرز طلب کرلیے گئے ہیں جو وہاں کاروائیوں میں مصروف ہیں لیکن آگ اتنی شدید ہے کہ اب تک قابو میں نہیں آسکی ہے ۔جنگل کی آگ سے ہلاک ہونے والوں کی تعداد میں مزید اضافے کا خدشہ ظاہر کیا جا رہا ہے ۔