یورپی ممالک ایک لالکھ ساٹھ ہزار مہاجرین کو پناہ دیں گے

مشرق وسطیٰ اور افریقی ملکوں سے یورپ کا رخ کرنے والے پناہ گزینوں کی تعداد میں مسلسل اضافہ ہوتا جا رہا ہے۔
یورپی یونین نے ایک لاکھ ساٹھ ہزار مہاجرین کو پناہ دینے کا منصوبہ بنایا ہے۔ جرمنی نے یورپی یونین سے مطالبہ کیا ہے کہ وہ رکن ملکوں میں ان مہاجرین کی منصفانہ تقسیم کے طویل المدتی منصوبے کو حتمی شکل دے۔
ادھر امریکا نے بھی کہا ہے کہ یورپ کو درپیش اس مسئلے میں واشنگٹن حکومت بھی مدد فراہم کرے گی۔ امریکی حکومت کے مطابق وہ مزید شامی مہاجرین کو پناہ دینے کے لیے تیار ہے۔ دوسری عالمی جنگ کے بعد سے یورپ کو ان دنوں مہاجرین کے بدترین بحران کا سامنا ہے۔
دریں اثنا ڈنمارک کو جرمنی سے ملانے والی موٹر وے کو جمعرات کو دوبارہ کھول دیا گیا ہے۔ اسے ایک روز قبل اس وقت بند کر دیا گیا تھا جب سیکڑوں پناہ گزینوں جن میں بچے بھی شامل تھے، اس پر پیدل ہی سفر شروع کر دیا تھا۔