اوکراینا ایرپین شهری نینگ روسلاردان آلیناندیغینی بیلدیریأر

ایرپین شهری سوُنگقی گۆنلرده روس قشونی بیلن اوکراینا قشونی آراسینداقی گۆیچلی ساواشینگ مرکزلریندن بیری.

کیف شهری نینگ حأکیی ویتالی کلیچکو اوکراینانینگ قشونی نینگ روس گۆیچلرینی شهردن قوُواندیغینی آیتدی.

ایرپین اوکراینانینگ پایتاغتی کیف شهری نینگ 20 کیلومتر دمیرقازیق گۆن باتارینداقی استراتژیک بیر شهر.

بیله کی تاراپدان اوکراینانینگ جمهورباشلیغی ولودیمیر زلنسکی فرانسیانینگ پارلمانیا ویدئوکنفرانس آرقالی بیانات بردی.

زلنسکی فرانسوز شرکتلری نینگ روسیادان چیقماغینی ایسله دی و "رنو، اوشان، لروی مرلین و بیله کی شرکتلر روسیانینگ ساواش ماشینینا مادّی قوُلداوینی دوروزمالیدیر" دیدی.

رنو شرکتی مسکوداقی کأرحاناسینی یانگاداندان آچاندان سوُنگرا اولی قارشیلیق گؤرۆپدی.

زلنسکی ژاپن پارلمانی اۆچین ده بیانات بردی.

اوکراینانینگ یوُلباشچیسی روسیانینگ باشلادان ساواشی سبأپلی اتمی کأرحانالارینگ حوُوپ آستیندا بوُلاندیغینی آیتدی.

ولودیمیر زلنسکی "هممأمیز روسیانی دوروزمالیدیرس. دۆنیأ بو ساواشی دوردورمالی. اوکراینانی، ارکینلیگی قوُلدایان هممه‌لره مینتدارلیق بیلدیریأرین اِمما ساواش دوُوام ادیأر" دیدی.

حالقارا اتم انرژیسی قوراماسی نینگ باشلیغی رافائل گروسی ده اوکرایناداقی اتمی کأرحانالارینگ حوُوپسوزلیغی باراسیندا قایغیسینی دیله گتیردی.

گروسی بو قورامانینگ جوُغاپکأرلری نینگ اوکرایناداقی اتمی دسگالارا گیرمه گینه روغصات بریلمه گینی ایسله دی.

کیف شهرینده بیر روس ژورنالیستینگ دا اؤلدۆریلندیگی حابار بریلدی.

اینسایدر آدینداقی بارلاغ سایتی اۆچین ایشله یأن اوکسانا بالینانینگ روس گۆیچلری نینگ آتووی سبأپلی اؤلِندیگی بیلدیریلدی.

بالینانینگ کیف دأکی پودولسک محله سینده بوُلان واغتی روس قشونی تاراپیندان اورلاندیغی اؤنگه سۆرۆلدی.

روسیانینگ دنسا دریاسیندا چرتیهیف شهرینی کیف شهرینه باغلایان اولی بیر کؤپرینی ده ییقاندیغی بیلدیریلدی.

اوکراینانینگ قوُرانماق وزیرلیگی ده روس گۆیچلرینی کی یف شهری نینگ گۆن باتارینداقی ماکاریف شهریندن چیقاراندیقلارینی حابار بردی.

گۆن باتارلی یوُلباشچیلار، روس گۆیچلری نینگ اوکراینادا آذیق و یانغیچ تاپماق اۆچین اولی قینچیلیق چکیأندیکلرینی بیلدیریأر.