Prezident Erdogan Awstriýanyň Premýer ministri Nehammer bilen duşuşyk geçirer

Awstriýanyň Premýer ministrligi tarapyndan Awstriýanyň Habarlar agentligine berilen ýazmaça beýanatda, Karl Nehammeriň iýun aýynyň ahyrynda geçiriljek sammitiň çäginde Prezident Erdogan bilen duşyşyk geçirjekdigi mälim edildi. 

Beýanatda Madritde geçiriljek sammite NATO agza bolmadyk ÝB-ne agza ýurtlaryň liderleriniň hem çagyrylandygy, Nehammeriň şol çakylyga laýyklykda Ispaniýa gitjekdigi habar berildi. 

Beýanatda birnäçe hepde ozal iki lideriň arasynda geçirilen telefon arkaly söhbetdeşlikde Russiýa-Ukraina söweşi bilen birlikde ikitaraplaýyn gatnaşyklaryň maslahatlaşylandygy bellenip, iki ýurdyň arasyndaky gatnaşyklaryň oňyn häsýetde özgerýändigi beýan edildi. 

Ýurdyň metbugatynda giňden orun berilen maglumatda, Karl Hehammeriň hem beýanaty çap edildi. 

Awstriýanyň Premýer ministri Karl Nehammer: "Ukrainanyň Döwlet baştutany Wladimir Zelenskiý bilen geçiren söhbetdeşliklerimde, Russiýanyň Döwlet baştutany Wladimir Putin bilen geçiren duşuşygymda we Prezident Erdogan bilen geçiren telefon arkaly söhbetdeşligimiň netijesinde, Stambul tapgyrynyň Ýewropada parahatçylyk üçin iň gowy mümkinçilik bolmaga dowam edýändigine ynanýaryn" diýip belledi. 

Iki ýurdyň arasyndaky gatnaşyklar soňky wagtlarda biri-birinden tapawutly derejede amala aşyrylan gepleşikleriň we saparlaryň çäginde özgermäge başlady. 

Awstriýanyň Daşary işler ministri Aleksandr Şallenbergiň Antalýa Diplomatiýa forumyna gatnaşmagy we soňky gezek Karl nehammeriň 12-nji aprelde Russiýa sapar guramadan ozal Prezident Erdogan bilen telefon arkaly söhbetdeşlik geçirmegi iki ýurdyň arasyndaky gatnaşyklaryň oňyn ýagdaýda özgermegine goşant goşdy.