Mewlüt Çawuşogly gün tertibiniň ileri tutulýan ugurlary bilen bagly beýanat berdi

Türkiýäniň Daşary işler ministri Mewlüt Çawuşogly, Prezident Rejep Taýýip Erdogan bilen ABŞ-nyň Prezidenti Donald Trampyň arasynda Liwiýa meselesi boýunça bilelikde işleşmek babatynda oňyn bir pozisiýanyň bardygyny we Waşington bilen Liwiýada umumy işler geçirmek babatynda buýruk alandyklaryny habar berdi. 

Mewlüt Çawuşogly, merkezi ofisi ABŞ-da ýerleşýän Türk-Amerikan Milli ugrukdyrma komitediniň wideo konferensiýa arkaly geçirilen maslahatynda gün tertibiniň ileri tutulýan ugurularynyň üstünde durup geçdi.  

Türk-Amerikan gatnaşyklarynda hemişe ösüşleriň we peselişleriň bolandygyny aýdan Çawuşogly, emma täze görnüş koronawirus epidemiýasy etabynyň iki ýurdyň arasyndaky gatnaşyklara hasam itergi berendigini belledi. 

Prezident Erdogan bilen Trampyň epidemiýanyň başyndan bäri ýakyn dialog içinde bolandyklaryny aýdan Çawuşogly, Türkiýäniň ABŞ-e ugradan lukmançylyk enjamlarynyň ýurtda uly hoşallyk döredendigini we hakyky hyzmatdaşlygyň näme diýmekdigi barada möhüm bir görkeziji bolandygyny mälim etdi. 

ABŞ-nyň soňky wagtlarda Liwiýa meselesi babatynda has işjeň rol eýeleýändigini aýdan Çawuşogly: "Hormatly Prezidentimiz, Türkiýe we ABŞ hökmünde bilelikde işleşmegimizi teklip etdi. Hormatly Tramp hem bu teklibe oňyn garady we biziň derejämizde, ýagny Daşary işler ministrler, Goranmak ministrler, Razwedka derejesinde bilelikde işleşmek barada buýruk aldyk. Häzirki wagtda tehniki derejede egindeşlerimizi gepleşikler geçirýärler. Bu ýerde umumy ýagdaýda hereket etmegimiz, sebitiň asudalygy we Liwiýanyň gelejegi taýdan möhümdir" diýip habar berdi. 

Waşingtonyň ekstremist terror guramasy ÝPG/PKK-a goldaw bermäge dowam etmeginden gözbaş alýan ABŞ bilen Türkiýäniň arasynda Siriýa meselesi babatynda pikir aýrylygynyň bardygyna ünsleri çeken Çawuşogly, bu ýagdaýyň beýleki sebitleýin meselelerde ýokdugyny beýan etdi. 

Türkiýäniň Fetullahçy terror guramasyna agza adamlaryň ýurda gaýtarylyp berilmegi bilen baglanşykly talaby we Ankaranyň Russiýadan S-400 howa goranyş ulgamlaryny satyn almagynyň hem iki ýurdyň arasyndaky meselelerdigini aýdan Çawuşogly: "Soňky wagtlarda esasan hem geçen ýyla garanyňda aramyzdaky gatnaşyklarda ösüşleriň bardygyny aýdyp bileris. Idlib operasiýasyndan soň iň güýçli goldaw ABŞ tarapyndan berildi" diýip ünsleri çekdi.