Çawuşogly koronawirus epidemiýasy zamanynda kärdeşleri bilen 49 gezek telefon arkaly söhbetdeş boldy

Türkiýäniň Daşary işler ministri Mewlüt Çawuşogly, täze görnüş koronawirus epidemiýasy zamanynda daşary ýurtly kärdeşleri bilen birlikde, NATO-nyň, Ýewropa Bileleşiginiň we BMG-nyň resmileri bilen 49 gezek telefon arkaly we 6 gezek telekonferensiýa arkaly söhbetdeş boldy, halkara derejede geçirilen 5 maslahata wideoşekilli göni aragatnaşyk arkaly gatnaşdy. 

Mewlüt Çawuşoglynyň koronawirus epidemiýasynyň çäginde geçiren halkara başlangyçlary, "Girişken we ynsanperwer daşary syýasat" we "Bilelikde ýeňeris" sözbaşylary bilen ministrligiň Twitter hasabyndan paýlaşyldy. 

Şoňa laýyklykda epdemiýa zamanynda halkara diplomatiýasyny dowam etdiren Mewlüt Çawuşogly, daşary ýurtly 44 kärdeşi bilen birlikde, NATO-nyň Baş sekretary Ýens Stoltenberg, ÝB-nyň Daşary gatnaşyklar we howpsyzlyk syýasatlary boýunça ýokary wekili Žozep Borrel, Türk Geňeşiniň Baş sekretary Bagdad Amreýew, BMG-nyň Palestinaly bosgunlar ýardam guramasynyň baş komissary Filip Lazzarini bilen telefon arkaly söhbetdeş boldy. 

Mewlüt Çawuşogly, epidemiýa sebäpli 19, 21, 27-nji mart bilen 7,17 we 28-nji aprelde kärdeşleri bilen geçiren telekonferensiýa arkaly söhbetdeşliginde koronawirusa garşy göreşde edip boljak umumy ädimleri ara alyp maslahatlaşdy. 

Ministr Çawuşogly, 2-nji aprelde Kovid-19 epidemiýasyna garşy göreşiň çäginde wideo konferensiýa arkaly geçirilen NATO-nyň Daşary işler ministrleriniň maslahatyna, 22-nji aprelde Yslam Hyzmatdaşlyk guramasynyň Ýerine ýetirijiler geňeşiniň nobatdan daşary maslahatyna, Eýran we Russiýa bilen bilelikde geçirilen Astana etabynyň çägindäki Siriýa temaly maslahata, 28-nji aprelde Türkiýe-Polşa-Rumyniýa Daşary işler ministrleriniň üçtaraplaýyn maslahatyna we 29-njy aprelde bolsa Afrika Bileleşiginiň "2021-nji ýyldan soň Somali" temaly Ýokary derejeli konferensiýa gatnaşdy.