Prezident Erdogan ABŞ-nyň Prezidenti Tramp bilen telefon arkaly söhbetdeşlik geçirdi

Prezident R. T. Erdogan ABŞ-nyň Prezidenti Donald Tramp bilen telefon arkaly söhbetdeşlik geçirdi.

Erdogan bilen Tramp telefon söhbetdeşliginde özara gatnaşyklar bilen birlikde sebitara meseleler hakynda pikir alyşdy.

Kommunikasiýalar edarasyndan berlen beýanata görä, iki lider ABŞ-nyň Prezidenti Trampyň çakylygyna laýyklykda 13-nji noýabrda Waşingtonda duşuşmak barada ylalaşyk gazandy.

Erdogan Twitterden ABŞ-nyň Prezidenti Donald Tramp bilen geçiren telefon söhbetdeşligi barada beýanat berdi.

Özara gatnaşyklar bilen birlikde sebitara meseleleri ara alyp maslahatlaşandyklaryny nygtan Prezident Erdogan, “Netijeli telefon söhbetdeşligini geçirdik. Telefon söhbetdeşliginde terrora garşy göreş we ýurtlarymyzyň arasyndaky söwda gatnaşyklary hakynda pikir alyşdyk. 13-nji noýabrda ABŞ-na gurajak saparymyz bilen birlikde şu gün geçiren telefon söhbetdeşligimiziň özara gatnaşyklaryň ösdürilmegi we sebitara meseleleriň çözülmegi taýdan düşümli boljakdygyna ynanýaryn” diýdi.

Tramp hem Twitterden beren beýanatynda “Erdogan maňa çaknyşykda gaçandygy aýdylýan terrorçy Abubekir Al Bagdadiniň aýaly we aýal dogany bilen birlikde DAIŞ-e aza birnäçe terrorçynyň tussag edilendigini aýtdy” diýdi.

Telefon söhbetdeşliginde mundan başgada Siriýa serhedi, terroryň ortadan aýrylmagy, ÝPG/PKK-a bilen birlikde beýleki meseleler hakynda pikir alyşandyklaryny nygtan Tramp, “Prezident Erdogany geljek çarşenbe güni 13-nji noýabrda Ak Tamda görmäge sabyrsyzlyk bilen garaşýaryn” diýip belledi.