Hakkari we Agry welaýatlarynda operasiýalar dowam edýär

Hakkari welaýatynda ekstremist terror guramasy PKK-ly terrorçylar tarapyndan ýoluň gyrasyna ýerleşdirilen partlaýjynyň, harby ulag kerweniniň geçýän mahaly partladylmagy netijesinde 4 esger ýeňil ýagdaýda ýaralandy.

Hakkariniň gubernatorlygy tarapyndan berilen beýanatda düýn ýerli wagt bilen sagat 21:30-da welaýatyň Çukurja etrabyndan merkeze tarap barýan ulag kerweniniň Agaçdibi obasynyň golaýyndan geçýän mahaly elde ýasalan partlaýjynyň ýarylandygy habar berildi.

Partlamanyň netijesinde 4 esgeriň ýeňil ýagdaýda ýaralanandygy aýdylan beýanatda hadysa bilen baglanşykly derňew işiniň başladylandygy mälim edildi.

Beýleki tarapdan Agry dagynda harby howa güýçleriniň goldaw bermeginde geçirilýän operasiýada ýene-de 5 terrorçy täsirsiz ýagdaýa getirildi.

Agrynyň gubernatorlygy tarapyndan berilen beýanatda welaýat Žandarma serkerdeliginiň Agry dagynda harby howa güýçleriniň goldaw bermegindäki operasiýasynyň dowam edýändigi habar berildi.

Gubernatorlyk tarapyndan berilen beýanatda: “Guralan howa operasiýalarynyň netijesinde 2018-nji ýylyň 6-njy iýunynda Türkiýäniň wagty bilen sagat 22:55-de Türkiýäniň serhetleriniň çägine girendigi anyklanan 5 terrorçy F-16 harby uçarlar bilen täsirsiz ýagdaýa getirildi. Sebitde operasiýa dowam edýär” diýildi.