Erdogan BMG-ni tankyt etdi

Erdogan: “Biz her pursatda bu meselä ünsleri çekýäris we “Dünýä 5-den uly” diýýäris. Bütin adamzadyň ykbalyny 5 ýurduň  syýasy bähbitleri bilen çäklendirmek ne aň-düşünjä, ne wyždana ne-de adalata sygar” diýdi.

Prezident Erdogan Stambulda geçirilýän BMG-niň Bütindünýä Ynsanperwer maslahatynyň “Çaknyşyklaryň öňüni almak we ony ortadan aýyrmak üçin syýasy liderlik” temaly 1-nji Ýokary derejeli mejlisde çykyş etdi.

BMG-niň mundan 70 ýyl ozal döredilmegindäki esasy maksadyň adamzady ölüme, pajyga we yzagalaklyga mejbur eden çaknyşyklaryň öňüniň alynmagy bolandygyny nygtan Erdogan: “Emma 70 ýyllyk taryhyna seredlende BMG-niň esasy başarnyksyzlygyny şu ugurda başdan geçirýändigini görýäris. Bu taýda ählimiziň, esasanda BMG-niň Howpsyzlyk Geňeşiniň jogapkärçiligi bar. 6 ýyldan bäri dowam edýän Siriýa meselesinde ony aç-açan gördük, başdan geçirdik. Weto hukugyndan wagtal-wagtal biperwaýlyk bilen peýdalanyp, gynansagam çykgynsyzlyklara we çaknyşyklara çäre görülmegini bökdeýär. Bu meselede her bir adam elini wyždanyna goýup pikirlenmeli, degişli çäreler görülmeli” diýdi.

Erdogan Bütindünýä Ynsanperwer Maslahatynyň açylyş dabarasynda-da çykyş etdi.

Prezident Erdogan maslahatda sözlän sözünde gam-gussanyň reňkiniň, diliniň, dininiň bolmaýandygyna gowy düşünýän Türkiýäniň siriýaly we yrakly 3 milliondan gowrak bosguny myhman alandygyny ýatlatdy.

Erdogan: “Buýsanç bilen nygtasym gelýär, bu bosgunlyk, sygynma işi dowam eden halatynda-da bombardymandan gaçan, uly howplara sezewar bolan siriýaly, yrakly kim bolsa bolsun gapymyz elmydama adamlara, adamkärçilige açyk bolar” diýdi.

Stambulyň Maslahatlar Merkeziniň Harbiýe zalynda geçirilen dabara BMG-niň baş Sekretary Pan Gi Mun bilen birlikde 60-a golaý ýurduň döwlet we hökümet ýolbaşçylary, ministrler, döwlet wekiliýetleri gatnaşýar.

Amerikaly aktýor Forest Witakeriň alyp barmagynda bolan açylyş dabarasynda dünýädäki gumanitar pajygalar barada wideo şekiller görkezildi.

İr-ertir geçirilen liderler mejlisinde-de Erdogan we Pan Gi Mun gysgaça çykyş etdiler.

Resmi naharly mejlise 60-a golaý döwlet we hökümet ýolbaşçysy bilen wekiller gatnaşdylar.

Gatnaşylar soň bolsa ýadygärlik surat aldyrdylar.

Maslahatda globa liderleriň “Adamzadyň gün tertibi” resminamasyny has-da giňeltmek üçin garaýyşlaryny beýan etjek mejlisleri geçiriler, dünýäniň gumanitar pajygalaryň çäginde duçar bolýan kynçylyklary barada liderleriň güýçli wadalar berip biljek telegek stol mejlisleri guralar.

BMG-niň Bütindünýä Ynsanperwer Maslahatynda 7 sany telegelek stol mejlisi, 15 sany ýörite mejlis we 120-ä golaý çäreler geçiriler.

Ynsanperwer kömek strategiýalary we adatdan daşary ýagdaýlara garşy netijeli syýasatlaryň kesgitlenmegini nazarda tutýan maslahatda Türkiýe gatnaşyjy ýurtlar bilen adatdan daşary we ynsanperwer kömek boýunça tejribe alyşar.