Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Ýeni Şafak” gazeti “Türk ýarym gyzylaý jemgyýeti Gazada gyzgyn nahar paýlamaga başlady” söz başyly habarynda, Türk ýarym gyzylaý jemgyýetiniň Ysraýylyň Gazanyň Rafah şäherine gury ýerden operasiýasy sebäpli 6-njy maýdan bäri arakesme berilen günlük 10 müň adamlyk naharhanasyndaky gyzgyn nahar paýlamaga Deýr Balah etrabynda gaýtadan başlandygyny ýazýar.
“Haber Türk” gazeti “Uralogly: “Ýakyn Gündogardaky söwda ýollary Türkiýäniň üstaşyr Ýewropa biriger” söz başyly habarynda, Ulaglar we infrastruktura ministri Abdulkadir Uraloglunyň Litwanyň Klaipeda portundan başlap; Polşadan, Slowakiýadan, Wengriýadan, Rumyniýadan, Bolgariýadan Türkiýä birikjek Wia Karpatiýa awto magistraly bilen Ýakyn Gündogardaky söwda ýollarynyň Türkiýäniň üstaşyr bütin Ýewropa birikjekdigini beýan edip; “Türkiýe Wia Karpatiýa taslamasyna goşulmaga we ähli hyzmatdaşlyga taýýar” diýen sözlerini çap edýär.
“Star” gazeti “Synagdan geçirilen “Togg” hakynda öwgüli sözler aýtdylar”söz başyly habarynda, Türkiýede öndürilen ýerli awtoulag “Toggy” synagdan geçiren Germaniýanyň köp tiražly žurnallaryndan “Auto Bildiň” milli awtoulag hakynda öwgüli sözler ýazandygyny mäliöm edýär. “Türk Teslasy iňňän gowy” söz başyly habarynda, “Toggyň” T10x modeli birnäçe daşary ýurt awtoulagy bilen deňeşdirildi, içerki we daşky dizaýnyna doly bal berildi. “Togguň” gysga möhletde uly üstünlige eýe bolandygyny ýazdy.
“Sabah” gazeti “Dünýäniň iň süýji çörekleriniň sanawynda ilkinji orny Türkiýäniň Samsun şäheri eýeledi” söz başyly habarynda, “Test Atlasyň” dünýä boýunça geçiren barlagyna görä, dünýäniň iň tagamly çörekleriniň kesgitlenendigini ýazýar. Sanawda Türkiýede Samsundan “Bafra pidesi” birinj, “Samsun pidesi” ikinji orny eýeledi.
“Hürriýet” gazeti “Ýokary ligada çempion Galatasaraý” söz başyly habarynda, Trendýol ýokary ligada 39-nji bäsleşiginde Galatasaraýyň myhmançylykda Konýasport komandasyny 3-1 hasabynda utup, 24-nji gezek çempion bolandygyny okyjy köpçüliginiň dykgatyna ýetirýär. 102 bal toplan sary-gyzyl reňki komanda liganyň taryhynda iň ýokary bal bilen çempion boldy.
