Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Hürriýet” gazeti “Erdogan: Germaniýa bilen düýpli gatnaşyklarymyza uly ähmiýet berýäris” söz başyly habarynda, Prezident R.T.Erdoganyň dost we ýaran Germaniýa bilen syýasy, ykdysady, harby, medeni we gumanitar ugurlardaky düýpli gatnaşyga aýratyn uly ähmiýet berýändiklerini aýdandygyny ýazýar.
“Sta” gazeti “Palestinany goldaýan aksiýalar gadagan edilýärkä, Gurhana garşy hüjümlere rugsat berilmegi iki standartlylykdyr” söz başyly habarynda, Daşary işler ministri Hakan Fidanyň düýn ÝB-niň Türkiýe wekiliýetiniň Başlygy İlçi Nikola Meýer-Landrut we ÝB-ne agza ýurtlaryň Ankaraky ilçilerini kabul edendigini okyjy köpçüliginiň dykgatyna ýetirýär. Fidan duşuşykda eden çykyşynda; “Käbir Ýewropa ýurtlarynda Palestina goldaw aksiýalaryň gadagan edilmegi boýunça başlangyçlar edilýärkä, mukaddes kitabymyz Gurhana garşy hüjümlere söz azatlygy bahanasy bilen rugsat berilmegi iki standartlylykdyr” diýdi.
“Haber Türk” gazeti “Atatürkiň mowzoleýine 29-njy oktýabrda rekord zyýarat” söz başyly habarynda, Milli goranmak ministrliginden düýn berilen beýannamada, Türkiýe Respublikasynyň 100-nji ýaşynda Beýik öňbaşçy M.K.Atatürkiň paýtagt Ankarada ýerleşýän aramgähine ýekşenbe güni 1,182,000 adamyň zyýarata barandygyny we onuň täze bir rekord bolandygyny mälim edendigine ünsleri çekýär.
“Sabah” gazeti “Kosmosa ýerli çemeleşme” söz başyly habarynda, Türkiýäniň ylmy we tehnologik barlaglar guramasynyň (TÜBİTAK) Başlygy Professor Hasan Mandalyň düýn ýerli aragatnaşyk hemrasy Türksat 6A-nyň 2024-nji ýylda uçuryljakdygyny aýdandygyny mälim edýär.
“Watan” gazeti “Deňiz önümleriniň eksportundan 9 aýda 313 million dollarlyk girdeji alyndy” söz başyly habarynda, Türkiýeden ýylyň 9 aýynda 35 ýurda edilen deňiz önümleriniň eksportundan 313,3 million dollarlyk girdeji alynandygyny okyjy köpçüliginiň dykgatyna ýetirýär.
