Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Haber Türk” gazeti “Stambul Maliýe Merkezi açyldy” söz başyly habarynda, Stambul Maliýe Merkezi taslamasynyň banklar tapgyrynyň açylandygyny mälim edýär. Prezident R.T.Erdogan dabarada sözlän sözünde: “Bu merkeziň esasy aýratynlygy, nähili strategik we öňden görülen taslama bolandygy geljekki ýyllarda hasam özüni görkezer” diýdi.
“Star” gazeti “Ministr Akar: 12 terrorçy täsirsiz ýagdaýa getirildi” söz başyly habarynda, Milli goranmak ministri Hulusi Akaryň düýn terror guramasy PKK-nyň Siriýanyň demirgazygynda 4 esgeriň ýaralanan hüjümine essesi bilen gaýtawul görkezilendigini we 12 terrorçynyň täsirsiz ýagdaýa getirilendigini aýdandygyny ýazýar.
“Hürriýet” gazeti “Ministr Dönmez: Tebigy gazyň nurbady açyldy, gaz akdyrmaga başladyk” söz başyly habarynda, Energetika we tebigy serişdeler ministri Fatih Dönmeziň Gara deňizde tapylan tebigy gazyň gury ýere getirilmegi boýunça ýetilen sepgit hakynda; “Düýn gije tebigy gaza guýularynyň nurbadyny açyp, esasy geçirijä gaz akdyrmaga başladyk. Maksadymyz penşenbe güni tebigy gazy gury ýere getirmek” diýen sözlerini okyjy köpçüliginiň dykgatyna ýetirýär.
“Sabah” gazeti “ABŞ-nyň Türkiýe üçin F-16 karary” söz başyly habarynda, ABŞ-nyň Döwlet sekretarlygynyň Türkiýäniň bar bolan F-16 harby uçarlarynyň aragatnaşyk ulgamy Link-16 taktiki maglumat aragatnaşyk torunyň döwrebaplaşdyryş enjamlarynyň satuwyny tassyklandygyny Kongresse habara berendigini ýazýar.
“Watan” gazeti “Ministr Warank: “İMEJE-niň” ýerlilik mukdary 90 göterime barabar” söz başyly habarynda, Senagat we tehnologiýalar ministri Mustafa Warankyň; “ “İMEJE-niň” ýerlilik mukdary 90 göterime barabar. Sebäbi biz “İMEJE-niň” enjamlaryny hem ýerli we milli şertlerde öndürdik” diýendigine ünsleri çekýär.
