Türk metbugatynyň gysgaça mazmuny
Gün tertibiniň ileri tutulýan ugurlary hakyndaky habarlar gündelik gazetlerde giň seslenme döredýär.
“Sabah” gazeti, “Daşary işler ministrliginden ABŞ-na we Kipriň grek bölegine berk duýduryş: Hiç kim el uzadyp bilmez” söz başyly habarynda, Daşary işler ministrliginiň, ABŞ-nyň Nýu-Žersi ştatynyň milli goragçylarynyň, Kipriň grek böleginiň hökümeti bilen şertnama baglaşmagyny berk ýazgarandygyny ýazýar.
Beýannamada, “Enewatan we hemaýatkär Türkiýäniň bar ýerinde Kipr türküne asla el uzadylup bilinmejekdigi hakykatyna Kipriň grek bölegi tarapyndan göz ýetirilmegini umyt edýäris. Kipr türk halkynyň howpsuzlygyna wehim saljak ähli hereketlere garşy durmaga dowam etjekdigimizi nygtaýarys” diýildi.
“Watan” gazeti, “Mehmetçik soňky 3 aýda 340 terrorçyny täsirsiz ýagdaýa getirdi” söz başyly habarynda, Milli Goranmak ministri Hulusi Akaryň düýn beren beýannamasynda “Mehmetçik soňky 3 aýda 340 terrorçyny täsirsiz ýagdaýa getirdi. Terrorçylara kimiň goldaw berýändigine, olara ýarag, dikuçar, ok-däri we pul berýändiklerine garamazdan terrorçylary täsirsiz ýagdaýa getirmekde egilşik etmeris” diýen sözlerine ýer berýär.
“Star” gazeti, “Iňlis metbugaty: Baýraktar TB2, Russiýanyň harby üstünligine zeper ýetirýär” söz başyly habarynda, Russiýanyň we Ukrainanyň ulanýan uçarmansyz howa ulaglaryny deňeşdiren iňlis köpçülikleýin habar beriş serişdeleriniň, Baýraktar TB-2-ä ünsi çekendigini belleýär.
Iňlis metbugaty, “Baýraktar TB2, Russiýanyň harby üstünligine zeper ýetirýär” diýip ýazdy.
“Ýeni Şafak” gazeti, “Akguýuda möhüm sepgide gelindi” söz başyly habarynda, Türkiýäniň ilkinji atom engeriýa bekedi Akguýu atom desgasynyň birinji böleginiň gurluşygyna 5 ýyl ozal badalga berlendigini ýatladýar.
Desganyň gurluşygy taýdan 5 ýylda uly işler alnyp baryldy, güýçli depginde gurluşygy dowam edýän taslamanyň şu ýyl birinji bölegi ulanylmaga berler.
“Hürriýet” gazeti, “Antalýa 3 Aýda 797 müň 929 syýahatçy geldi” söz başyly habarynda, Antalýa 2023-nji ýylyň ýanwar aýynyň 1-i bilen mart aýynyň 31-i aralygynda 797 müň 920 syýahatçynyň gelendigini habar berýär. Syýahatçylaryň sanawynda ruslar birinji, nemesler ikinji, iňlisler üçünji orny eýeledi.
