Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler
Haber Türk gazedi: "Potratçylykda maksat 75 milliard dollar" söz başyly habarynda, Prezident Rejep Taýýip Erdoganyň: "Halkara Potratçylyk hyzmatlarynyň ululygy 2030-njy ýyllarda 750 milliard dollara ýetmegi göz öňünde tutulýar. Ýurdumyzyň bu uly tortdan aljak paýy ilkinji tapgyrda 10 göterime, ýagny 75 milliard dollara ýetirmegi ählimiz bilelikde maksat edinýäris" diýendigini okyjy köpçüliginiň dykgatyna ýetirýär.
Hürriýet gazedi: "Russiýadan Antalýa uçar gatnaw meýilnamasy" söz başyly habarynda, Russiýadaky agentlikler bilen syýahatçylyk kärhanalarynyň Türkiýede takmynan 2 aý soň ýapyljak dynç alyş möwsüminden soň, Antalýa bilen baglanşykly täze meýilnamalary düzmäge başlandygyny habar berýär. Gyş aýlarynda Uzak Gündogar we Karib sebitinde dynç almak isleýän rus syýahatçylaryň Russiýadan gönüden ýola çykmagyň agyr we ýadaw ýolagçylyk boljakdygyny aýdan Russiýanyň Tup operatorlar bileleşiginiň başlygynyň orunbasary Aleksan Mykyrçan: "Iň amatly we rahat ýol meýilnamasy Türkiýede Antalýa howa menziliniň işledilmegi bolar" diýip nygtady.
Watan gazedi: "Iň köp nebit ätiýajyna eýe ýurtlaryň sanawy aýan edildi" söz başyly habarynda, Halkara Energetika agentliginiň dünýäde iň köp nebit ätiýajyna eýe bolan ýurtlaryň sanawyny täzeländigini mälim edýär. Berilen maglumata görä jemi öndürip bolýan nebit gorlary 1 trillion 779 milliard barrele çykan bolsa, Türkiýäniň dünýäniň ençeme ýurdundan öňe geçmegi ünsleri özüne çekdi. Türkiýe 340 million barrel bilen sanawyň 18-nji ornuna geçdi.
Ýeni Şafak gazedi: "Birža Stambula daşary ýurtlaryň gyzyklanmasy" söz başyly habarynda, Birža Stambul BIST 100 indeksiniň, 3 müň 100 bal çägini geçendigini aýan edýär. Birža Stambulyň ýokarlamagyna daşary ýurt maýadarlaryň gyzyklanmalary möhüm rol eýeledi, indeks şu ýylyň başyndan bäri 61 göterim artyş etdi.
Star gazedi: "Akardan terrora garşy göreşde tutanýerlilik ýüzlenmesi" söz başyly habarynda, Türkiýäniň Ýaragly güýçleriniň, PKK/PÝD we PÝD-e garşy operasiýasyna ünsleri çeken Milli Goranmak ministri Hulusi Akaryň: "85 million raýatymyzyň howpsuzlygyny üpjün etmek üçin tagalla edýäris" diýendigini habar berýär. Ýeke-täk nyşanalarynyň terrorçylardygyny aýdan Hulusi Akar: "Terrorçylar nirede bolsa, nyşanamyz hem şol ýerdir. Haçana çenli dowam eder bu operasiýa? Iň soňky terrorçy täsirsiz ýagdaýa getirilýänçä çenli dowam eder" diýip belledi.
