Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Watan” gazeti “Oktaý: Hüjümleriň bes edilmegi üçin uly tagalla edýäris” söz başyly habarynda, Prezidentiniň orunbasary Fuat Oktaýyň; “Ukrainada hüjümleriň bes edilmegi, ynsanperwer geçelgäniň açylmagy we gepleşikleriň parahatçylyk bilen netijelenmegi üçin uly tagalla edýäris. Hüjümleriň bes edilmegi boýunça çagyryşlarymyzy, sebitimiziň parahatçylygy we durnuklylygy üçin köpugurly diplomatik başlangyçlarymyzy dowam etdireris” diýen sözlerini okyjy köpçüliginiň dykgatyna ýetirýär.
“Hürriýet” gazeti “Antalýada üçtaraplaýyn sammit 10-njy martda” söz başyly habarynda, Daşary işler ministri Mewlüt Çawuşoglunyň Ukraina-Russiýa söweşi hakynda beren beýannamasynda, edilen diplomatik tagallalaryň netije berendigini aýdandygyny ýazýar. Çawuşogly rus we ukrain kärdeşleri bilen 10-njy martda Antalýada maslahat geçirjekdiklerini beýan etdi.
“Star” gazeti “Fransuz metbugaty: Putin liderlerden esasan Erdogan bilen aragatnaşyk saklaýar” söz başyly habarynda, Fransiýada ýerleşýän “Frans 24” ýaýlym organynyň Ukraina meselesinde Türkiýe-Russiýa diaglogy hakynda analiz berendigini mälim edýär. Habarçy Žasper Mortimer Russiýanyň döwlet Ýolbaşçysy Putiniň Prezident R.T.Erdogan bilen beýleki liderlerden has köp aragatnaşyk saklaýandygyny aýtdy.
“Ýeni Şafak” gazeti “Gresiýanyň Premýer-ministri Mikotakis Türkiýä sapar eder” söz başyly habarynda, Gresiýanyň Premýer-ministri Kiriýakos Mikotakisiň Türkiýä sapar gurajakdygyny we ýekşenbe güni Prezident R.T.Erdogan bilen duşuşjakdygyny okyjy köpçüliginiň dykgatyna ýetirýär.
“Sabah” gazeti “THÝ-niň Ukraina we Moldowa saparlary hakyndaky beýanaty” söz başyly habarynda, Türk howaýollarynyň Russiýanyň hüjümleri sebäpli Ukrainanyň howa giňişliginiň raýat uçuşlaryna ýapylmagy sebäpli Ukraina we Moldowa boýunça kabul eden gatnawy bes etmek hakynda kararyny 22-nji marta çenli uzaldandygyny mälim edýär.
