Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Haber Türk” gazeti “Erdogan: Ýurdumyzy tebigy apatlara taýarlamak üçin gije-gündiz işläris” söz başyly habarynda, Prezident R.T.Erdoganyň düýn beren beýannamasynda Türkiýäni tebigy apatlara taýarlamak üçinn gije-gündiz işlemäge dowam etjekdiklerini aýdandygyny ýazýar. Gazet Izmirde ýer titremesinde ýitgi çekenleriň ähli islegleriniň birkemsiz kanagatlandyrylandygyny beýan eden Erdoganyň, harabalyklaryň gysga möhletde aýryljakdygyny we bir aýyň dowamynda ýaşaýyş jaýlaryň gurluşygyna başlanjakdygyny aýdandygyny okyjy köpçüliginiň dykgatyna ýetirýär.
“Star” gazeti “Çawuşogly Al Sani bilen duşuşdy” söz başyly habarynda, Türkiýe-Katar Ýokary strategik komitetiň 6-njy maslahatynyň Daşary işler ministrleriniň derejesindäki geňeşmelerine gatnaşmak üçin Antalýa baran Çawuşoglunyň katarly kärdeşi Al Sani bilen duşuşandygyny mälim edýär. Duşuşyk hakynda Twitterden habarnama beren Çawuşogly “Ýokary derejeli gatnaşyklarymyzy hasam güýçlendirjek başlangyçlary seljerdik. Sebitleýin we halkara meselelerdäki utgaşyklygymyzy ýene-de bir gezek nygtadyk” diýip ýazdy.
“Hürriýet” gazeti “Albaýrak: “Fatih” burawlaýyş gämimiz Türkali-1 guýusynda gözleg işlerini başlatdy” söz başyly habarynda, Gazna we maliýe ministri Berat Albaýragyň düýn “Fatih” burawlaýyş gämisiniň Türkali-1 guýusynda gözleg işlerine başlamagy hakynda sosial media hasabyndan “Ençeme saparlara, ençeme ýeňişlere! “Fatih” burawlaýyş gämimiz Türkali-1 guýusynda gözleglerine başlady. Düşümli bolsun” diýip ýazandygyna ünsleri çekýär.
“Sabah” gazeti “Stambulyň Sabiha Gökçen adyndaky howa menzili oktýabr aýynda 1,9 million ýolagçy kabul etdi” söz başyly habarynda, Stambulyň Sabiha Gökçen adyndaky howa menziliniň koronawirus pandemiýasynyň dowamyndaky iň ýokary ýolagçy sanyna ýetendigini nygtap, ýolagçy sanyny sentýabr aýyna görä 6 göterim artdyran howa menziliniň oktýabr aýynda 1,9 million ýolagçyny kabul edendigini ýazýar.
“Ýeni Şafak” gazeti “Türkiýäniň ilkinji Ýaragly kapitansyz deňiz ulagy ulanmaga berilýär” söz başyly habarynda, Türkiýäniň ilkinji Ýaragly kapitansyz deňiz ulagynyň dekabr aýynda ulanmaga beriljekdigini, milli raketa ulgamlaryny öndürýän “ROKETSAN-yň” öndüren 4 sany Jirit we 2 sany L-UMTAS raketa ulgamlary bilen 2021-nji ýylyň birinji çärýeginde atyş synaglaryny geçirejekdigini okyjy köpçüliginiň dykgatyna ýetirýär.
