Türk metbugatynyň gysgaça mazmuny

Haber Türk gazedi: "Prezident Erdogandan Millete ýüzlenip çykyş etdi" söz başyly habarynda, Prezident Rejep Taýýip Erdoganyň, Millete ýüzlenip eden çykyşynda: "15-nji iýul gijesi erkinlige aşyk şu milletiň aýagyny ýene-de bir gezek gandallamaga synanşdylar we hudaýa şükür, onuň hötdesinden gelip bilmediler. Azanymyzyň sesini kesmek, baýdagymyzy düşürmek, milli ygtyýary basgylamak isleýänleri şanly göreş bilen derbi dagyn etdik" diýendigini habar berýär. 

Hürriýet gazedi: "Aýasofýada 15-nji iýula bagyşlanyp ýörite horeografiýa çykyşy boldy" söz başyly habarynda, Prezidentiň Kommunikasiýalar edarasy tarapyndan 15-nji iýul temasyna bagyşlanyp Aýasofýanyň öňündäki meýdançada 100 adamdan ybarat topar tarapyndan horeografiýa çykyşynyň bolandygyny mälim edýär. Çykyş "Unutma, unutdurma" temasy bilen geçirilip, ýerli we daşary ýurtly syýahatçylar tarapyndan uly şowhun bilen tomaşa edildi. 

Watan gazedi: "Britaniýanyň Goranmak ministri: Türkiýe oýuny üýtgetdi" söz başyly habarynda, Britaniýanyň Goranmak ministri Ben Uolles tarapyndan berilen beýanatda, Türkiýäniň uçarmansyz howa ulaglarynyň Liwiýada we Siriýada täsirli ýagdaýda ulanylmagynyň oýuny üýtgediji häsýetde bolandygyny aýdandygyny okyjy köpçüliginiň dykgatyna ýetirýär. Britaniýanyň goranyş ugrunda beýleki ýurtlardan nusga almalydygyny aýdan Uolles: "Türkiýäniň Baýraktar TB-2-leri Liwiýada nähili derejede ulanylandygyna üns beriň" diýip belledi. 

Ýeni Şafak gazedi: "Ýerli ulagy öndürjek fabrigiň düýbi şenbe güni tutular" söz başyly habarynda, Ýerli we milli ulag fabriginiň düýbiniň Prezident Rejep Taýýip Erdogan tarapyndan şenbe güni tutuljakdygyny beýan edýär. Türkiýäniň milli taslamasy bolan ýerli ulagyň fabrigi Bursa welaýatynyň Gemlik etrabynda gurular we 4 müň 323 adamy iş bilen üpjün eder. 

Star gazedi: "Amerikaly Afiniti kärhanasy Türkiýäni saýlady" söz başyly habarynda, Amerikaly Afiniti kärhanasy Türkiýä maýa goýmak barada karar kabul edendigini aýan edýär.