Türkiýäniň Daşary Işler Ministri Özbegistanly Kärdeşi Bilen Duşuşyk Geçirdi

Ýurdyň paýtagty Daşkent şäherinde iki ýurdyň Daşary işler ministrlikleriniň wekiliýetleriniň arasynda geçen gepleşiklerde, Türkiýe bilen Özbegistanyň arasyndaky Ýokary derejeli strategik hyzmatdaşlyk geňeşi ara alynyp maslahatlaşyldy.  

Mewlüt Çawuşogly, toparara gepleşiklerden ozal beren beýanatynda, Daşkent şäherine gelmeden ozal saparynyň medeni bölüminde Hywa we Samarkant şäherlerine baryp, Türkiýäniň Samarkant şäherindäki Baş konsullygynyň açylyşyny ýerine ýetirendiklerini ýatladyp, şol saparda özlerini ýalňyz goýmadyk Abdulaziz Kamilowa minnetdarlyk bildirdi. 

Şu gün Bilelikdäki strategik meýilleşdiriş toparynyň maslahatyny geçirjekdiklerini aýdan Mewlüt Çawuşogly: "Ýokary derejeli strategik hyzmatdaşlyk geňeşiniň 2-nji maslahatynyň taýarlyklaryny başladyp, 1-nji maslahatda kabul edilen kararlaryň we gol çeken ylalaşyklarymyzyň durmuşa geçirilişine gözegçilik ederis. Türk Geňeşi, Owganystan we beýleki sebitleýin meseleleri ara alyp maslahatlaşarys" diýip belledi. 

Abdulaziz Kamilow bolsa, maksatlarynyň iki ýurdyň arasyndaky strategik hyzmatdaşlyklaryny artdyrmakdygyny beýan etdi. 

Kamilow, Çawuşoglynyň Prezident Şewket Mirziýoýew tarapyndan kabul ediljekdigini, ondan soň bolsa Wise-premýer, Maýa goýumlar we Daşary söwda ministri Sardor Umurzakow bilen hem duşuşyk geçirjekdigini mälim etdi.