Gazagystan Demirgazyk Koreýanyň hereketini berk ýazgardy

Ýurdyň Daşary işler ministrliginden berilen beýanatda synagyň BMG-niň Howpsyzlyk geňeşiniň kararyna ters gelýändigi, dünýä parahatçylygyna howp salýandygy we hem sebitleýin hem-de global derejede ýagdaýlary durnuksyzlaşdyrýandygy bellendi.

Demirgazyk Koreýanyň jogapkärçiliksiz syýasatynyň dünýädäki ýadro ýaragsyzlandyrma etabyna ýaramaz täsir ýetirýändigi we ýadro ýaragsyz geljegiň üpjün edilmegindäki tagallalaryň köküni paltalaýandygy aýdylýan beýanatda: “Demirgazyk Koreýanyň öz halkynyň howpsyzlygy we galkynyşy, mundan başgada bütin adamzadyň bähbitleri üçin ýadro hereketlerinden ýüz öwürmäge çagyrýarys” diýip bellendi.

Beýanatda meseläniň diňe gepleşikler arkaly çözülmelidigi nygtaldy.

Ýaponiýa 28-nji iýulda Demirgazyk Koreýanyň ballistik raketa synagyny geçirendigini we raketanyň Ýaponiýanyň ykdysady sebitindäki suwlaryna gaçandygyny habar berdi.