Howp astyndaky türk diller atly kitap Ankarada tanyşdyryldy
Maslahatda howp astyndaky türk diller bilen arabaglanşykly ýörite wideo-sýužet görkezildi
UNESKO tarapyndan yglan edilen 2016 Hoja Ahmed Ýasawy ýyly we Türki dilli döwletleriň garaşsyzlyklarynyň 25 ýyllygyna bagyşlanyp Howp astyndaky türk diller atly kitabyň paýtagt Ankarada tanyşdyrlyş maslahaty geçirildi.
Halkara Türk-Gazak Ahmet Ýasawy uniwersiteti, Türk dil guramasy we Halkara Türk Akademiýasynyň goldaw bermeginde taýarlanan Howp astyndaky türk diller atly kitabyň tanyşdyrlyş maslahatyna Ahmet Ýasawy uniwersitetiniň Dolandyryjylar geňeşiniň başlygy Musta Ýyldyz, Halkara Türk Akedemiýasynyň başlygy Darhan Hydyrali, Türk Dil guramasynyň başlygy Mustafa Kaçalyn, Atatürk adyndaky medeniýet, dil we taryh guramasynyň başlygy Derýa Örs, Türk Ylymlar Akademiýasynyň başlygy Ahmet Jewat Ajar we Halkara Türk medeniýet guramasy TÜRKSOÝ-yň Baş sekretarynyň orunbasary Fyrat Purtaş bilen birlikde ylmy işgärler, talyplar we köpçülikleýin habar beriş serişdeleriniň wekilleri gatnaşdylar.
Howp astyndaky türk diller atly kitabyň tanyşdyrlyş maslahaty Milli bilim ministri Ismet Ýylmazyň maslahata gatnaşylara hugradan gutlag ýüzlenmesiniň okalmagy bilen başlady.
Maslahatda howp astyndaky türk diller bilen arabaglanşykly ýörite wideo-sýužet görkezildi.
Ahmet Ýasawy uniwersitetiniň talyplary hem maslahatda konsert programmasy bilen çykyş etdi.
Talyplar altaý, karaçaý, gagauz, tatar, başgyrt we nogaý aýdymlaryny ýerine ýetirdi.
Howp astyndaky türk diller atly 4 tomlyk kitap 6 ýylda Başkent uniwersitetiniň mugallymy Prof. Dr. Süer Eker we Hajettepe uniwersitetiniň mugallymy Prof. Dr. Ülkü Çelik Şawk tarapyndan taýarlanýar.
Kitapda sosial we syýasy şertler sebäpli howp astynda bolan 60-a golaý türk dili hakynda maglumat berilýär.
Maslahatda çykyş eden Ahmet Ýasawy uniwersitetiniň Dolandyryjylar geňeşiniň başlygy Musa Ýyldyz, Türk Ylymlar Akademiýasynyň başlygy Prof. Dr Ahmet Jewat Ajar, Türk dil guramasynyň başlygy Prof. Dr Mustafa Kaçalyn, Atatürk adyndaky medeniýet, dil we taryh guramasynyň başlygy Prof. Dr. Derýa Örs, Türk Akademiýasynyň başlygy Darhan Hydyrali türk dilleriniň goralyp saklanmagynyň we geljek nesillere ýetirilmeginiň ähmiýetine ünsi çekdi.
Maslahatyň ahyrynda kitabyň awtorlary Başkent uniwersitetiniň mugallymy Prof. Dr. Süer Eker we Hajettepe uniwersitetiniň mugallymy Prof. Dr. Ülkü Çelik Şawka ýadigärlik sowgat gowşuryldy.
