ABŞ DEAŞ-H Guramasynyň Ýolbaşçysy Hakynda Maglumat Üçin 10 Million Dollar Baýrak Goýdy

ABŞ-nyň döwlet Sekretarlygy Owganystanda iş alyp barýan DEAŞ-H guramasynyň ýolbaşçysy Şahab al Mohajir atlandyrylýan Sanaullah Gafari we 26-njy awgustda Kabulyň Hamid Kerzeý adyndaky halkara howa menziline guralan bombaly hüjümiň jogapkärleri hakynda maglumat üçin 10 million dollar baýrak goýdy.

Amerikan hökümeti 2015-njy ýylda Global terror guramalarynyň sanawyna goşulan DEAŞ-H guramasynyň ýolbaşçysy üçin gözleg başlatdy.

ABŞ-nyň döwlet Sekrtarlygyndan berilen beýannamada; “Döwlet Sekretarlygynyň Diplomatik howpsuzlyk gullugy tarapyndan iş ýüzüne geçirilýän Adalat üçin baýrak maksatnamasy Şahab al Mohajir atlandyrylýan Sanaullah Gafariniň şahsyýetini ýa-da ýerini görkezýän we 26-njy awgustda Kabulyň Hamid Kerzeý adyndaky halkara howa menziline guralan bombaly hüjümiň jogapkärleriniň haýsydyr bir ýurtda saklanmagyna ýa-da tussag edilmegine sebäp boljak her bir maglumat üçin 10 million dollara çenli baýrak berer” diýilýär.

Beýannamada DEAŞ-yň esaslandyryjylarynyň Gafarini 2020-nji ýylyň iýun aýynda DEAŞ-H terror guramasynyň ýolbaşçylygyna belländigi habar berildi.

Gafariniň Owganystandaky ähli DEAŞ-H operasiýaslaryny tassyklamadan we olar üçin serişde bölüp bermekden jogapkärdigine üns çekilýän beýannamada; “Döwlet Sekretarlygy 2021-nji ýylyň 22-nji noýabrynda Prezidentiň 13224 belgili kararyna laýyklykda Ýörite global terror sanawyna goşdy” diýilýär.

ABŞ-nyň Owganystandan çekilme tapgyrynyň ahyrynda, 26-njy awgustda Kabulyň Hamid Kerzeý adyndaky halkara howa menziliniň öňünde bombaly hüjüm guralyp, 13 Amerikan esgeri bilen 170 owgan aradan çykypdy.

18 sanysy Amerikan esgeri, 150-den gowrak adamyň ýaralanmagyna sebäp bolan hüjümiň jogapkärçiligini DEAŞ-H boýun alypdy.