Russiýanyň harby polisiýasynyň gözegçilik işleri dowam edýär
Russiýanyň Goranmak ministrligi, Türkiýe bilen Russiýanyň arasyndaky ylalaşyga laýyklykda Siriýanyň demirgazygynda Russiýanyň Harby polisiýasynyň täze ýerlerde gözegçilik işlerini geçirýändigini habar berdi
![Russiýanyň harby polisiýasynyň gözegçilik işleri dowam edýär](http://cdn.trt.net.tr/images/xlarge/rectangle/1830/4654/89dd/5db690891a941.jpg?time=1718926993)
Russiýanyň Goranmak ministrliginiň Siriýadaky Taraplary Ylalaşdyrma merkezinden berilen beýanatda, Russiýanyň harby polisiýasynyň ylalaşyga laýyklykda Siriýa-Türkiýe serhedinde patrullyk işlerini geçirýändigini aýan etdi.
Beýanatda: “Russiýanyň harby polisiýasy Ajemi-Karakoza-Kobani-Koran, Kamyşly-Fakira, Kamyşly-Simalka liniýalarynda patrullyk işlerini geçirdi” diýip nygtaldy.
Iki ýurdyň arasynda gazanylan ylalaşyga laýyklykda ertir agşama çenli sebitdäki ähli ÝPG/PKK-a agza terrorçylaryň çykarylmagynyň gerekdigi bellenen beýanatda: “29-njy oktýabr sagat 18:00-a çenli kürt harby güýçleriniň we ýaraglarynyň Siriýa-Türkiýe serhediniň 30 km daşyna çykarylmagy gerek. Mundan soň Parahatçylyk çeşmesi operasiýasynyň serhetleriniň çäginde günbatarynda we gündogarynda 10 km çuňlukda, Kamyşly şäherinden daşary Türk-Rus gözegçilik işleri başlar” diýip habar berildi.
Mundan başgada terror guramasy ÝPG agza terrorçylaryň ýaraglary bilen bilelikde Manbij we Tel-Ryfatdan çykarylmalydygy aýdylýan beýanatda: “Bu işleriň durmuşa geçirilmegi, Siriýa-Türkiýe serhedindäki ýagdaýy durnuklylyga getirmäge ýardam eder” diýip nygtaldy.