تورکیه: ان سرت شکیلده اعتراض ائدیریک
" واشینگتون‌داکی ائلچیلیگیمیز ایقامتگاهی اؤنونده 16 می 2017 تاریخینده باش وئرن حادثه‌لره باغلی ادعانامه‌نین قبول اولوندوغونون آچیقلانماسی تأسفله قارشیلانمیش‌دیر"
تورکیه، آمریکانین واشینگتون بؤلگه‌سی یوکسک محکمه‌سی ساوجی‌لیغی‌نین، واشینگتون ائلچیلیگی ایقامتگاهی قارشی‌سیندا 16 میده باش وئرن حادثه‌لره باغلی ادعانامه‌نین قبول ائدیلمه‌سینی تأسفله قارشیلادی.
خاریجی ایشلر باخانلیغین‌نین آچیقلاماسیندا، "واشینگتون بؤلگه‌سی یوکسک محکمه‌سی باش ساوجی‌لیغی‌نین، واشینگتون‌داکی ائلچیلیگیمیز ایقامتگاهی اؤنونده 16 می 2017 تاریخینده باش وئرن حادثه‌لره باغلی ادعانامه‌نین قبول اولوندوغونو آچیقلاماسی تأسفله قارشیلانمیش‌دیر" ایفاده‌سینه یئر وئریلدی.
آچیقلامادا بون‌لار قید ائدیلدی:
"اولایین آمریکا یئرلی تهلوکه‌سیزلیک مقام‌لاری‌نین جدی دقت‌سیزلیک‌لری، نماینده هیاتیمیزین تهلوکه‌سیزلیگی‌نین تامین اولونماماسی و گؤستریجی پرده‌سی آلتیندا پ‌کاکا ترور هؤرگوتو طرفدارلاری‌نین تخریباتلاریندان قایناقلاندیغی داها اول آمریکا مقام‌لارینا بیر چوخ سویه‌ده و دفعه‌لرله دیله گتیریلمیش اولماسینا باخمایا‌راق، حادثه یئرینده اولمایان، حتی هئچ آمریکایا گئتمه‌میش اولان آدلارین دا سوچلاندیغی حاق‌سیز و یانلی بیر ادعانامه‌نین قبول ائدیلمه‌سینه ان سرت شکیلده اعتراض ائدیریک. مسئله‌یه دایر تپکیمیز، آمریکانین آنکارا‌داکی ائلچیسینه ده چاتدیریلمیش‌دیر".
آچیقلامادا آیریجا "تامامیله سیاسی بیر یاخلاشیملا، اساس‌سیز و حاق‌سیز شکیلده بو یئره گتیریلن و آمریکادا بعضی سیاسی دایره‌لرین مسئله‌نی گرگینلشدیرمه چابا‌لاری‌نین بیر پارچا‌سی کیمی گؤردوگوموز بو حادثه باره‌سینده حقوقی یول‌لارلا مباریزه حاقیمیزی ساخلی توتوروق" ایفاده‌سینه یئر وئریلدی.
