آمریکا تورکیه ایله امکداش‌لیق ائده‌جک
آمریکا‌نین باشقان یاردیمچیسی جو بایدن فئتو ترور تشکیلاتی‌نین دسته‌باشی‌سی فتح‌الله گوله‌نین قایتاریلماسی باره‌ده تورکیه ایله امکداش‌لیق ائده‌جک‌لرینی سؤیله‌دی.
آمریکا‌نین باشقان یاردیمچیسی جو بایدن فئتو ترور تشکیلاتی‌نین دسته‌باشی‌سی فتح‌الله گوله‌نین قایتاریلماسی باره‌ده تورکیه ایله امکداش‌لیق ائده‌جک‌لرینی سؤیله‌دی.
باش ناظرلیگین منبع‌لرین‌دن وئریلن معلوماتا اساساً جو بایدن باش ناظر بینالی ییلدیریما زنگ ائتدی.
گؤروشده بایدن میلتین چئوریلیشه جهد قارشی‌سیندا اورتایا قویدوغو جسارتی تعریف‌له‌دی و اؤلکه‌سی‌نین ده چئوریلیشه جهدی درحال پیسله‌دیگینی دئدی.
متفیق‌لری تورکیه‌یه دستک وئرمکده داوام ائده‌جک‌لرینی بیلدیرن بایدن فتح‌الله گوله‌نین تورکیه‌یه وئریلمه‌سی باره‌دکی گؤزلنتی‌لرینی بیلدیگینی، بو مؤوضودا آمریکا محکمه‌لری طرفیندن قرار وئریلمه‌سی‌نین لازیم اولدوغونو، هر شرطده مؤوضو ایله باغلی اولا‌راق تورکیه ایله بیرلیکده چالیشا‌جاق‌لارینی بیلدیردی.
باش ناظر بینالی ییلدیریم دا دؤولت باشچی‌سی اردوغانین رهبرلیگینده میلتین و تهلوکه‌سیزلیک قوه‌لری‌نین جسور بیر موباریزه ایله فئتونون چئوریلیشه جهدی‌نین قارشی‌سی‌نین آلیندیغینی سؤیله‌دی.
ترورچولارین 246 گوناه‌سیز وطنداشی قتله یئتیردیگینی، 1536 وطنداشی ایسه یارالادیغینی بیلدیرن باش ناظر تورکیه-آمریکا آراسینداکی علاقه‌لرین ایستراتژی اهمیتینه توخونا‌راق فتح‌الله گولن و باشچی‌لیق ائتدیگی ترور تشکیلاتی‌نین ضررلی فعالیت‌لری باره‌ده آمریکا رهبرلیگینه اوزون مدت‌دیر خبردارلیق ائدیلدیگی، بو چرچیوه‌ده 15 جولای گونو باش وئرن چئوریلیشه جهدین دسته‌باشی اولان فتح‌الله گوله‌نین تورکیه‌یه تحویل وئریلمه‌سی اوچون واجیب اولان مراجعت سندلری‌نین بو اؤلکه‌یه چاتدیریلدیغینی و بیر متتفیق اولا‌راق آمریکادان گؤزلنتی‌لری‌نین فتح‌الله گوله‌نین تورکیه‌یه وئریلمه‌سی اولدوغونو قئید ائتدی.
