علییئو: اونلار آذربایجان قارشیسیندا دورابیلمزلر
"ارمنی اوردوسو ان مدرن سلاحلارلا تجهیز ائدیلسه بئله ساواشی قازانانین اینسانلار و اونلارین روحو اولدوغونو اونوتمامالیلار"
آذربایجان جمهورباشقانی ایلهام علییئو، آمریکا بیرلشمیش دؤولتلرینین گۆنئی قافقازدا آراچی اؤزللیگینی ایتیردیگینی ایفاده ائد‌رک آوروپا پارلمانینین دا آذربایجان قارشیدی توتوم سرگیله‌دیگینی قید ائتدی.
علییئو، باشکند باکیدا آدا اونیوئرسیته‌سینده تشکیل ائدیله‌ن قاراباغ قونولو ییغینجاقدا دانیشدی.
ایلهام علییئو، آذربایجان-ارمنیستان دیالوگونون سون ایللرده آمریکا، آوروپابیرلیگی و روسیا محورلی داوام ائتدیریلدیگینی خاطیرلاداراق،
"بو آن باکیدا اولان آمریکانین آوروپا و آوراسیادان مسئول خاریجی ایشلر باخان کؤمکچیسی جیمز اوبراین، اؤلکه‌میزه قارشی بعضی گسوچلامالار دیله گتیردی. آمریکا رهبرلیگی ده ایلک دفعه آذربایجانین اوست سویه مسئوللارینین سفرلرینی انگلله‌یه‌جگینی بیلدیردی. اؤنجه‌لر استراتژیک اؤلچوده سیر ائد‌ن دیالوگوموز، بو آنکی آمریکا رهبرلیگی اوزوندن مینیموم سویه‌یه ائندی. بونون سببینی آچیقجاسی بیلمیریک" ایفاده‌لرینی ایشلتدی.
آمریکادان وئریله‌ن "آذربایجانلا ایلیشکیلر اسکیسی کیمی اولمایاجاق" آچیقلامالارینی خاطیرلادان جمهورباشقانی علییئو،
"یاخشی او زامان آمریکا، باکی و ایروانا یئنی باریش گؤروشمه‌سی تکلیف ائتسه آذربایجان خاریجی ایشلر باخانی بو دیالوگا نئجه قاتیلاجاق؟ سفره مانع تؤره‌دیله‌جک می؟ دئمک کی واشینگتن، گونئی قافقازدا آراچی اؤزللیگینی ایتیریر. جیمز اوبراین ایله بو گونکو گؤروشمه‌میزده، 'ایلیشکیلر نورمالا دؤنور' ایفاده‌سی گؤزله‌ییریک. عکسی وضعیتده، باریش ماساسیندا آراچی اولاراق یالنیز بروکسل و موسکوا قالاجاق" دئدی.
آوروپا پارلمانینین آذربایجان قارشیدی توتوم سرگیله‌دیگینی ایفاده ائد‌ن آذربایجان جمهورباشقانی علییئو،
"آوروپا پارلمانی، مسئولیتسیز اینسانلار بیرلیگینه بنزه‌مه‌یه باشلادی. حتی اورادا بعضیلری تام بیر مانیاک کیمی داوراناراق آذربایجان قارشیدی آچیقلامالاردا سانکی نورمال پسیکولوژینین سرحدلرینی زورلاییر" دئدی.
ایلهام علییئو، فرانسا و هیندیستانین ارمنیستانا سلاح ساتاراق، اودو آلوولاندیردیقلارینی ایفاده ائد‌رک "ارمنیستان سؤزو گئدن سلاحلارلا قاراباغی تکرار ایشغال ائده‌بیله‌جگینی دوشونه‌بیلر. آنجاق ارمنی اوردوسو ان مدرن سلاحلارلا تجهیز ائدیلسه بئله ساواشی قازانانین اینسانلار و اونلارین روحو اولدوغونو اونوتمامالیلار. ارمنیستان ۲.جی قاراباغ ساواشی دؤونمینده ۱۲ مین عسگر قاچاغینین اولدوغونو بیلدیرمیشدی. یعنی اونلار آذربایجان قارشیسیندا دورابیلمزلر" دگرل‌ندیرمه‌سینی وئردی.
