آمریکادان آذربایجان و ارمنیستان آراسیندا واریلان آنلاشمایا دستک

آمریکا بیرلشمیش دؤولتلری خاریجی ایشلر باخانی آنتونی بلینکن، آذربایجان و ارمنیستان آراسیندا واریلان آنلاشمانی دستکله‌دیکلرینی ایفاده ائتدی.

آمریکا خاریجی ایشلر باخانی آنتونی بلینکن آذربایجان جمهورباشقانی ایلهام علییئو و ارمنیستان باشباخانی نیکول پاشینیان ایله ائتدیگی تلفن دانیشمالاریندا، ایکی اؤلکه آراسینداکی باریش سۆره‌جینی اله آلدی.

آمریکا خاریجی ایشلر باخانلیغیندان وئریله‌ن آچیقلامایا گؤره، بلینکن، ۱۹۹۱ده ایمضالانان آلماتی بیلدیرگه‌‌سینین، آذربایجان و ارمنیستان آراسیندا سرحدلرین تعیین اولونماسی اوچون ایستیفاده ائدیلمه‌سینه ایدایر آنلاشمانی سئوینجله قارشیلادی.

بلینکن، علییئو و پاشینیان ایله آذربایجان و ارمنیستان آراسینداکی باریش گؤروشمه‌لرینی اله آلارکه‌ن، آمریکانین، باکی و ایروان یؤنه‌تیملری آراسیندا "داواملی" و "شرفلی" باریشین قورولماسی اوچون دستگینی چاتدیردی.

آنتونی بلینکن، علییئو ایله گؤروشمه‌سینده آمریکا ایله آذربایجان آراسینداکی ایکیلی ایلیشکیلرین گلیشدیریلمه‌سینه دایر ایسته‌گینی ده وورغولادی.

بلینکن، آمریکانین آذربایجانلا انرژی، ایقلیم و باغلانتی هدفلری قونوسوندا امکداشلیق ائتمه ایسته‌گینه دقت چکه‌رک، بو ایل آذربایجاندا تشکیل ائدیله‌جک بیرلشمیش میللتلر ایقلیم دییشیکلیگی چرچیوه آنلاشما‌سی ۲۹.جو طرفلر کنفرانسینین (کوپ۲۹) باشاریلی نتیجه‌له‌نمه‌سینی آرزو ائتدی.

پاشینیان ایله ائتدیگی تلفن دانیشماسیندا ایسه بلینکن، آمریکانین، ارمنیستانین اگمنلیگینه و تورپاق بۆتوولوگونه دستگینی یئنه‌له‌دی.