بیرلشمیش میللتلر: قاراباغدا ارمنیلره قارشی خشونت یوخ
دوجاریک، خسته‌خانالار، اوخوللار، ائولر، دینی و مد‌نی مرکزلرین هدف آلینمادیغینی و اکینچیلیک ساحه‌لری و حیوانلارا دا ضرر وئریلمه‌دیگینین گؤرولدوگونو قید ائتدی
آذربایجانین قاراباغ بؤلگه‌سینه گئدن بیرلشمیش میللتلر هیئتینین، ارمنی وطنداشلارا قارشی شدت تطبیق اولوندوغونا باغلی اولقویا راستلانمادیغی، بؤلگه‌ده وطنداش آلت یاپیلارین هدف آلینمادیغینی گؤردوگو آچیقلاندی.
بیرلشمیش میللتلر سؤزچوسو استفان دوجاریک، بیرلشمیش میللتلر هیئتینین آذربایجان حکومتینین دعوتی اوزرینه هفته سونو قاراباغ بؤلگه‌سینه تشکیل ائتدیگی سفر حاقیندا بیلگی وئردی.
هیئتین بؤلگه‌ده‌کی اینسانی وضعیت احتیاجلارینی تعیین ائتمه‌یه چالیشدیغینی بیلدیرن دوجاریک، هیئت‌ده آرالاریندا دونیا ساغلیق هؤرگوتو، بیرلشمیش میللتلر اوشاقلارا کؤمک صاندیغی (یونیسف) و بیرلشمیش میللتلر سیغینماچیلار یوکسک کمیسرلیگی و بیرلشمیش میللتلر اینسانی ایشلر کووردیناسیون اوفیسیندن نماینده‌لر اولدوغونو قید ائتدی.
دوجاریک، هیئتین، لاچین‌داکی سرحد کنترل نقطه‌سینده و خانکندی شهرینده آراشدیرمالار آپاردیغینی ایفاده ائد‌رک "هیئت، ارمنیلره قارشی شدت تطبیق اولوندوغونا باغلی اولقویا راست گلمه‌دیگینی، بؤلگه‌ده سیویل آلت یاپیلارین هدف آلینمادیغینی گؤردوکلرینی بیلدیردی" ایفاده‌لرینی ایشلتدی.
خسته‌خانالار، اوخوللار، ائولر، دینی و مد‌نی مرکزلرین هدف آلینمادیغینی و آذربایجان حکومتینین ساغلیق خیدمتینی تکرار کسینتیسیز ایجرا ائتمک اوچون ایشلر باشلاتدیغینی ایفاده ائد‌ن دوجاریک، اکینچیلیک ساحه‌لری و حیوانلارا دا ضرر وئریلمه‌دیگینین گؤرولدوگونو قید ائتدی.
استفان دوجاریک، هیئتین بؤلگه‌ده‌کی ارمنی توپلومونون نوماینده‌لری ایله ده بیر آرایا گلدیگینی بیلدیردی.
بؤلگه‌ده تکرار گووه‌ن تاسیسینین اؤنمینه وورغو ائد‌ن دوجاریک، بوتون طرفلرین بونون اوچون چابا صرف ائتمه‌سی لازیم اولدوغونون وورغولادی.
