قوبا، تورک دؤولتلری تشکیلاتی اکینچیلیک باشکندی اعلان ائدیلدی
"سیرایلا هر ایل بیر شهر تورک دؤولتلری تشکیلاتی اکینچیلیک باشکندی اعلان ائدیلهجک"
آذربایجان جمهوریتینین باشکندی باکیدا تشکیل ائدیلهن تورک دؤولتلری تشکیلاتی اکینچیلیکدن مسئول ۲.جی باخانلار ییغینجاغیندا، اؤلکهنین قوبا شهری، "تورک دؤولتلری تشکیلاتی اکینچیلیک باشکندی" اعلان ائدیلدی.
آذربایجان اکینچیلیک باخانی مجنون ممدووون ائو صاحیبلیگینده تشکیل ائدیلهن ییغینجاغا، تورک دؤولتلری تشکیلاتی باش یازمانی ائلچی کوبانیچبک عومورعلییئو، اکینچیلیک و اورمان باخانی ابراهیم یوماکلی، اؤزبکیستان اکینچیلیک باخانی عزیز وویتوو، قوزئی قیبریس تورک جمهوریتی اکینچیلیک و طبیعی قایناقلار باخانی حسین چاووش، قیرقیزیستان اکینچیلیک باخانی بیرینجی کؤمکچیسی مراد راماتوو و قازاقیستان اکینچیلیک باخانی کؤمکچیسی آبیلخایر تامابک قاتیلدی.
ییغینجاقدان سونرا بیلدیری ایمضالایان باخانلار، مطبوعاتا آچیقلامالار وئردی.
آذربایجان اکینچیلیک باخانی ممدوو،
"آذربایجان طرفی اولاراق تورک دؤولتلرینین تک دیجیتال اکینچیلیک بیلگی پلتفورمونون یارادیلماسی، اکینچیلیک و غذا محصوللارینین تورک دؤولتلری تشکیلاتی مارکی آلتیندا اورتاق اورهتیمی کیمی فیکیر و تکلیفلریمیزی عضو اؤلکهلره سوندوق و بو ایستیقامتده ایشلر گؤرولمهسی قونوسوندا آنلاشمایا واردیق.
تورک دؤولتلری تشکیلاتی اؤلکهلرینده اکینچیلیک باشکندی اولماسینی دا تکلیف ائتدیک. سیرایلا هر ایل بیر شهر تورک دؤولتلری تشکیلاتی اکینچیلیک باشکندی اعلان ائدیلهجک. بو ییغینجاقدا آذربایجانین قوبا شهرینی تورک دؤولتلری تشکیلاتی اکینچیلیک باشکندی اعلان ائتدیک" ایفادهلرینی ایشلتدی.
باخان یوماکلی دا، مطبوعات توپلانتیسیندا وئردیگی آچیقلامادا، داوام ائتدیریلهبیلیر اکینچیلیک، اؤزو اؤزونه یئتمه و غذا تهلوکسیزلیگینین تامین ائدیلمهسینین هدفلهنمهسی خصوصلارینی دانیشدیقلارینی ایفاده ائتدی.