صابیرین 'اومید'سیزلیگی - ابراهیم ساوالان
یاوروم، قوزوم، یاتانلار آییلماز، محالدیر
میرزه علی‌اکبر صابیر 1908جی ایلین یاییندا شاماخیداکی کروانسارالارین بیرینین ایکی اوتاغینی خالچاچی دوستو حاجی آغاعلی‌نین یاردیمی ایله تعمیر ائدیب اوردا «اومید» آدلی بیر مکتب آچدی. صابیر بیر ایل سونرا او مکتبی باغالاماغا مجبور قالیب باکی‌یا کؤچدو.
صابیرین اومید مکتبی بیر ایل یاشاسا دا اوردان، نئچه یازیجی و عالیم چیخدی. آذربایجان یازارلار بیرلیگی‌نین عضوو حاجی‌بابا نظرلی اومید مکتبینده اوخوموشلاردان بیری ایدی. «جاسوسون یاردیمچیسی»، «قیشلاقدان کنده»، «ساتقین»، «لاچین» و «اؤلولر رقص ائدرکن» کیمی اثرلرین یازاری اولان حاجی‌بابا، ایستالین دؤورونده اؤز خالقینا صادیق قالدیغینا گؤره، گوللـه‌لندی.
حاجی‌بابا نظرلی، میرزه علی‌اکبر صابیردن بئله بیر خاطیره نقل ائدیر: آتام منی کوهنه اوصول مکتبدن چیخاردیب، صابیرین اومید مکتبینه آپاردی. بیز کوهنه اوصول مکتبینده فلکه و چوبوق گؤرموشدوک. صابیرده ایسه فلکه و چوبوقدان آزاد اولدوق، آما سئوینمه‌دیک. چونکو صابیر بیزی تاثیرلی سؤزلرله دانلاییردی.
صابیر، بیر گون مکتبه چوخ غمگین و مضطرب گیردی. مبصر اوشاقلارین لیسته‌سینی اوخودو:
احمد جعفراوغلو -حاضیر
نجف مختارزاده -حاضیر
حاجی‌بابا علسگرزاده -حاضیر
تقی ابوذراوغلو -... تقی ابوذراوغلو -...
تقی‌نین عوضینه صابیر «اونو دفتردن پوزون، گلمه‌یه‌جک» دئدی. صابیر درین بیر درد ایچینده «او، گلمه‌یه‌جک، قارداشلاری اونو مکتبدن چیخاریب، ایشه گؤندرمیشلر. او، باشماقچی شاگیردلیینه گئدیر» دئدی.
تقی اون‌بئش یاشلی، ذکی و چالیشقان بیر طلبه ایدی. آتاسی ابوذر اون گون اوول اؤلموشدو و آتاسیز تقی ایشله‌مه‌یه مجبور اولموشدو. یئتیم قالاراق چؤرک قازانماق اوچون تحصیلدن ال‌چکمه‌یه مجبور اولان اوشاغین وضعیتی شاعیرین قلبینی یارالامیشدی.
صابیر اوگون دولوخسونوب آغلادی:
ای دربه‌در گزیب اوریی قان اولان چوجوق
بیر لقمه نان اوچون گؤزو گریان اولان چوجوق
اولسون اَسَف او میللته کیم بی‌خیالدیر
یاخود خیالی کندینه تکثیر مالدیر
یاوروم، قوزوم، یاتانلار آییلماز، محالدیر
آنجاق منیمکی ناله، سنینکی سئوالدیر.
