باکیدا عاشیقین 100 یاشینا یئرلی‌لری تبریز و قاراداغ‌دان گلدیلر
آذربایجانین باشکندینده عاشیق حسین جوانین آنا‌دان اولماسی‌نین 100 ایللیگینه حصر ائدیلمیش خاطیره گئجه‌سی کئچیریلدی
باکیدا عاشیقین 100 یاشینا یئرلی‌لری تبریز و قاراداغ‌دان گلدیلر
آذربایجانین باشکندینده عاشیق حسین جوانین آنا‌دان اولماسی‌نین 100 ایللیگینه حصر ائدیلمیش خاطیره گئجه‌سی کئچیریلدی.
ساریلیب بوینونا بیر کؤرپه سایاق،
دویونجا حوسنونه باخایدیم، تبریز!
سن بیر داغ اولایدین، من ده بیر بولاق،
شیرهاشیر سینن‌دن آخایدیم، تبریز!
بو سؤزلرین مؤلفی ایراده سارییئوا داها سونرا بؤیوک صنعتکار حاقیندا دئییر: “بو ایل اونون آنا‌دان اولماسی‌نین 100 ایلی تامام اولور. یوز یاش‌لی ده‌ده‌دی جوان حسین. حسرت یول‌لاری‌نین یولچوسو اولوب اؤمرو بویو. هارا گئدیب حسرتله، نیسگیلله، آیریلیقلا قول-بویون اولوب. ائله بیل تانری اونو هیجران سئل‌لرینی سازی‌نین سیم‌لرینه سپه‌لمک اوچون یاراتمیشدی.
یوخولار گؤرردی. یوخولاریندا ایکییه بؤلونن وطنی بوتؤو، ائللری آزاد، شاد-خرم گؤروردو، گئرچک‌لیکده ایسه آغیر حقیقتله اوز-اوزه گلیردی. تبریز حسرتینی سؤزونده، سازیندا دیله گتیریب هم اؤزو یانیردی، هم ده عرش-آلانی یاندیریردی.”
آذربایجان عاشیق‌لار بیرلیگی‌نین تشببوسو ، مدنیت و توریزم ناظیرلیگی‌نین تشکیلاتچی‌لیغی ایله کئچیریلن گئجه‌ده علم، مدنیت، اینجه‌صنعت خادیم‌لری، توپلوم نماینده‌لری، تبریز و قاراداغ‌دان گلمیش قوناق‌لار قاتیلدیلار.
آذربایجان عاشیق‌لار بیرلیگی‌نین صدری، امکدار علم خادیمی محرم قاسیملی عاشیق حسین جوانین حیات و فعالیتین‌دن گئنیش شکیلده صحبت آچدی.
عاشیق جوانین یوبیلئی گئجه‌سینده قاتیلان بؤیوک بی علی اکبر اوغلو تدبیرله باغلی دئییر: “مجلیس چوخ یوکسک سوییه‌ده تشکیل اولونموشدو و بئله ده باشا چاتدی. من صمیمی قلب‌دن آذربایجان دولتینه و عاشیق‌لار بیرلیگی‌نین صدری پروفسور محرم قاسیملی‌یا تشککور ائدیرم.”
قید ائدک کی، عاشیق حسین جوان 1916-جی ایلده ایرانین شرقی آذربایجان ایالتی‌نین قاراداغ محلی‌نین اوتی کندینده آنا‌دان اولوب. آتاسی وفات ائتدیک‌دن سونرا عائله آذربایجانین آغدام بؤلگهسینین شرفخان‌لی کندینه پناه گتیریب. عاشیق علسگرین قارداشی اوغلو عاشیق موسی‌دان صنعتین سیرلرینی اؤیرنیب. شیفاهی خالق ادبیاتینی درین‌دن منیمسدیگینه گؤره توی-دوگون‌لرده، ائل شن‌لیک‌لرینده چیخیش ائتمه‌یه باشلاییب، اوخودوغو ائل هاوا‌لاری و یازدیغی شعرلرله اینسان‌لارین قلبینه یول تاپیب.
1946-جی ایلین مارس‌یندا تبریزده دولت درام تئاتری تشکیل اولونارکن او، دیرکتور معاوینی وظیفه‌سینده چالیشیب، اینقیلابی روحلو نغمه‌لری ایله چیخیش ائدیب. بورادا عاشیق‌لار آنسامب‌لی یارادیب. میللی حکومتین سوقوتون‌دان سونرا دوست‌لاری‌نین کمکی ایله باکی‌یا قاییدان، 1946-جی ایلده م. ماقومایئو آدینا آذربایجان دولت فیلارمونیاسیندا سولیست کیمی فعالیت گؤسترن عاشیق سونرا‌دان - 1948-جی ایلدن گورانبوی بؤلگهسینین عزیزبی اوف کندینده یاشاییب.
موسکوادا آذربایجان ادبیاتی و اینجه‌صنعتی اونگونلوگونده عاشیق‌لار آنسامب‌لی‌نین هنری رهبری کیمی ایشتیراک ائدن عاشیق حسین جوانین یارادیجی‌لیغی هر زامان یوکسک قیمتلندیریلیب و او، بیر سیرا نیشان و میدال‌لارلا وئریلیب. عاشیق 1985-جی ایل نوابرین 14-نده وفات ائدیب.
عاشیق شعری‌نین بوتون نوعلرینده اثرلر یارا‌دان عاشیق جوان اساساً گرای‌لی و قوشما‌لارا اوستونلوک وئریب، وطن گؤزل‌لیک‌لرینی، امک قهرمان‌لارینی اؤز شعرلرینده وصف ائدیب. یوکسک اینسانی کئیفیته، فیطری ایستعدادا مالیک حسین جوان هر زامان سئویلیب، ائل شن‌لیک‌لری‌نین بزه‌گی اولوب. اونلارلا گنج عاشیقین یئتیشمه‌سینده بؤیوک امگی اولان، اوچ داستان یارا‌دان حسین جوانین بیر-بیری‌نین آردینجا چاپ اولونان “آزادلیق ماهنی‌لاری”، “صدف‌لی ساز”، “دانیش تئل‌لی سازیم”، “ائل عاشیغی” کیمی 10-آ یاخین شعرلر کیتابی اونا عموم خالق محبتی قازاندیریب.
گونئی آذربایجانین اوزان اوغلو عمرونون بؤیوک بیر حیسه‌سینی قوزئی آذربایجاندا یاشادی. اما هئچ واخت اوغوللوق بورجونو اونوتمادی.
تبریز بیر آنا‌دیر، سن ده اوغلوسان،
ائل بیلیر، اورک‌دن اونا باغلیسان،
اوغلون ستارخان‌دان سینه داغلیسان،
اونونجون آغاریب باشین قاراداغ.
اونون سازی-سؤزو آذربایجانین هر ایکی تاییندا آزادلیق سمبولونا چئویریلیب. اؤزون‌دن سونرا دا شاگیردلر یادیگار قویوب.
