"ارمنیستان قاراباغدا ایشغال ائتدیگی تورپاق‌لاردان چیخسین"
"داغ‌لیق قاراباغ پروبلئمی‌نین اوبیری اولوسلارآراسی بؤیوک بحران‌لارین کؤلگه‌سینده قالماسین‌دان اؤزونتو دویولور"
آوروپا شوراسی پارلامنترلر مجلسی سیاسی ایشلر کمیته‌سی، ارمنیستان‌دان یوخاری قاراباغدا ایشغال ائتدیگی تورپاق‌لاردان حربی بیرلیک‌لرینی گئری چئکمه‌سینی ایسته‌دی.
کمیته کنفرانسیندا قبول ائدیلن قرار تاساریسیندا، "داغ‌لیق قاراباغ دیشین‌داکی ایشغال آلتین‌داکی اوبیری آذربایجان تورپاقلاریندان دا ارمنی‌لرین عسگرلرینی و دوزنسیز بیرلیک‌لرینی گئری چئکمه‌سی و آذربایجان‌ین تورپاق بوتؤو‌لوگونون تاسیسینه، مینسک پروسه‌سی چرچیوه‌سینده تامامیله سایغی گؤسترمه‌سی" ایسته‌ندی.
مینسک قروپونون داغ‌لیق قاراباغین گئچیجی ایستاتوسونو دانیشماق اوزره توپلانماسی چاغریسی وئریلن قراردا، بو گئچیجی ایستاتوس ایله اؤزارک یؤنه‌تیمین گوونلیگی‌نین تامین ائدیلمه‌سی، ناخجیوانا آچیلا‌جاق دهلیز، یوخاری قاراباغی ارمنیستانا باغلایا‌جاق دهلیزی ده احاطه ائده‌جک باشقا گوون آرتیریجی تدبیرلرین ده ایچینده اولدوغو قونولارین یئنه بو توپلانتیدا اله آلینماسی توصیه‌سینده بولونولدو.
"داغ‌لیق قاراباغ پروبلئمی‌نین اوبیری اولوسلارآراسی بؤیوک بحران‌لارین کؤلگه‌سینده قالماسین‌دان اؤزونتو دویولدوغو" بیلدیریلن قراردا، "پروبلئمین حلی‌نین گئجیکمه‌سی‌نین آوروپا شوراسی‌نین ایکی اؤلکه‌سی آراسین‌داکی گرگین‌لیگی ساواشا قدر آپارا‌بیله‌جگی" اویاریسی وئریلدی.
قراردا، آذربایجان و ارمنیستان‌دان داغ‌لیق قاراباغ پروبلئمی‌نین باریش یولو ایله حلی اوچون گؤستریلن چابالارا دستک وئرمه‌لری ایستنیرکن، ایکی اؤلکه‌یه حربی گوج ایستیفاده‌سین‌دن اوزاق دورما‌لاری چاغریسی یاپیلدی.
قراردا، "آوروپا گوونلیک و ایش بیرلیگی تشکیلاتی‌نین داغ‌لیق قاراباغ سرحدلری و دیگر ایشغال آلتین‌داکی تورپاق‌لاردا گوونلیگین تامین ائدیلمه‌سی و یئرلرین‌دن ائدیلمیش انسان‌لارین تورپاق‌لارینا گوونلی بیر شکیلده گئری دؤنوشلری‌نین تامین ائدیلمه‌سی اوچون اولوسلارآراسی باریش گوجو گؤرولندیرمه‌سی" ایسته‌ندی. قراردا، بو باریش گوجونون آتیشکس پوزونتولارینی آراشدیرابیلمه‌سی ایسته‌ندی.
سیاسی ایشلر کمیته‌سین‌دن قبول ائدیلن راپور و بونا باغ‌لی قرار تاساریسی، 2016.جی ایلین ژانویه آییندا آوروپا شوراسی پارلامنترلر مجلسی باش قورولونون ایسترازبورگداکی اوتوروموندا نهایی اولاراق اویلاناجاق.
