۹.جو کۆره‌سل باکی فورومو
بیرینجی‌سی ۲۰۱۳.جو ایلده گئچیریله‌ن کۆره‌سل باکی فورومو، سایغین اولوسلارآراسی بیر پلتفورما چئوریلمیش دورومدا
۱۶-۱۸ ژوئن ۲۰۲۲.جی ایل تاریخلرینده باکی‌دا نظامی گنجوی اولوسلارآراسی مرکزی طرفیندن ۹.جو کۆره‌سل باکی فورومو گئچیریلدی. آذربایجان جمهورباشقانی ایلهام علییئوین حمایه‌سی ایله گئچیریله‌ن بو فوروما ۵۳ اؤلکه‌دن ۴۰۰ نفره یاخین نماینده قاتیلدی. باکی‌دا گئچیریله‌ن فورومون ایشتیراکچیلاری آراسیندا گورجوستان جمهورباشقانی سالومه زورابیشویلی، آلبانیا جمهورباشقانی ایلیر متا، بوسنی و هرزگووین جمهورباشقانلیغی شوراسینین باشقانی شفیک جافروویچ، دونیا ساغلیق هؤگوتو تشکیلاتینین باشقانی تدروس گبریسوس و تۆرک دؤولتلری تشکیلاتی آغساققالی بینعلی ییلدیریم دا وار ایدی. فورومدا بونلارلا یاناشی، بیر چوخ اسکی جمهورباشقانی، اسکی مجلیس باشقانی، اسکی باشباخان و باخانلار، اولوسلارآراسی تشکیلاتلارین باش کاتیبلری و اوزمانلار ایشتیراک ائتدی. بو ایل کۆره‌سل باکی فورومو «کۆره‌سل دونیا نظامینا تهدیدلر» قونوسو آلتیندا گئچیریلدی.
آذربایجان جمهورباشقانی ایلهام علییئو، ۹.جو کۆره‌سل باکی فورومونون آچیلیشیندا دانیشدی. کۆره‌سل و بؤلگه‌سل گۆونلیک، انرژی گۆونلیگی مسئله‌لرینه توخونان پرزیئنت ایلهام علییئو، گونئی قافقازدا باریش و دینجلیگین برقرار اولماسی ایستیقامتینده آتدیقلاری آددیملاری آچیقلادی. ارمنیستانین لازیم اولان آددیملاری آتماقدا تردد ائتدیگینی و قاراباغا اؤزل ایستاتوس وئریلمه‌سی مسئله‌سینی گوند‌مه گتیرمه‌یه چالیشدیغینی قید ائد‌ن ایلهام علییئو، «ارمنیستان آذربایجانین تورپاق بوتؤولویونو سورغولاماغا داوام ائدرسه، آذربایجانین باشقا یولو قالمایاجاق و ارمنیستانین تورپاق بوتؤولویونو سورغولایاجاق» دئدی. علییئو، ارمنیستانین زنگه‌زور دالانینی آچماسی لازیم اولدوغونو وورغولادی. زنگه‌زور دالانی ایله باغلی بونو خاطیرلاتماقدا فایدا وار کی، آذربایجانین انرژی باخان یاردیمچیسی ائلنور سولطانوو سؤزوگئدن فوروم‌داکی چیخیشیندا، آذربایجانین گله‌جک‌ده زنگه‌زور دالانی ایله آوروپایا الکتریک انرژیسینی صادر ائده‌بیله‌جگینی، زنگه‌زور دالانینین آوروپا اؤلکه‌لری اوچون فایدالی اولاجاغینی بیلدیردی. جمهورباشقانی ایلهام علییئو، مینسک قروپو سون ۲۸ ایلده هئچ بیر پروبلئمی حل ائتمه‌دیگینی، ایشله‌وسیز اولدوغو اوچون آرتیق بو قروپا احتیاج اولمادیغینی سؤزلرینه علاوه ائتدی. جمهورباشقانی ایلهام علییئو، فوروما گلن بعضی قوناقلاری جمهورباشقانلیغی ساراییندا آیریجا قبول ائتدی.
فوروما ایشتیراک ائد‌ن قوناقلار، آذربایجانین بؤلگه‌سل باریش، بؤلگه‌سل اقتصادی قالخینما و امکداشلیق، انرژی عرضه‌سی، سرعتلی نقلیاتین تامین ائدیلمه‌سی قونوسوندا گؤستردیگی چابالاری تقدیر ائتدیلر. باکی‌دا گئچیریله‌ن اوتوروملار باشا چاتدیقدان سونرا قوناقلار، قاراباغا سفر ائتدیلر. ۱۹ ژوئن تاریخینده کۆره‌سل باکی فورومونون دارتیشما پانئلی شوشادا گئچیریلدی.
*
۹-جو کۆره‌سل باکی فورومون‌دا اولوسلارآراسی ایلیشکیلر، ساواش و چاتیشمالار، انرژی گۆونلیگی، ساغلیق، ارزاق گۆونلیگی و ائکولوژیک پروبلئملر کیمی دونیا گوند‌مینده اولان ارنملی پروبلئملر موذاکیره اولوندو. ایشتیراک‌چیلارین اکثریتی بیرلشمیش میللتلر تشکیلاتیندا اصلاحاتلارین آپاریلماسی، ساواش و چاتیشمالارین عاجیل اولاراق دوردورولماسی، یئنیله‌نه‌بیلیر انرژی قایناقلارینین آرتیریلماسی، سو قایناقلارینین قورونماسی و قناعتله قوللانیمی قونولاریندا آنلاشما اولدو. فورومدا دونیا گوند‌مینین سرعتله دییشدیگی وورغولاندی و ایلگیلی قرارلاری آلما و اویغولاما مکانیزملرینین حیاتا گئچیریلمه‌سینین اؤنمی بیلدیریلدی.
آذربایجان بو جور اولوسلارآراسی تدبیرلر سایه‌سینده حاقلی اولدوغو قاراباغ دعویسینی اولوسلارآراسی جامعه‌یه ائشیتدیره‌بیلدی. بو تشکیلات اولوسلارآراسی ساحه‌ده آذربایجانا گوج قاتیر. اؤزتله، بیرینجی‌سی ۲۰۱۳.جو ایلده گئچیریله‌ن کۆره‌سل باکی فورومونون سایغین و معتبر اولوسلارآراسی پلتفورما چئوریلدیگینی سؤیله‌یه‌بیله‌ریک.
