اینگیلیستان ائرکن سئچکیلره گئدیر
سوناک: اینگیلیستان کرالی (چارلز) ایله گؤروشدوم و پارلمانین بوراخیلماسینی خواهیش ائتدیم. کرال بو طلبی قبول ائتدی و بیز جولای 4-ده عومومی سئچکیلر کئچیرهجَییک
بؤیوک بریتانیانین باش ناظیری ریشی سوناک عمومی سئچکیلرین ۴ جولای تاریخینده کئچیریلهجیینی آچیقلاییب.
ریشی سوناک ناظیرلر کابینهسینین هفتهلیک ایجلاسیندان سونرا باش ناظیرلیگین 10 نؤمرهلی اوفیسی قارشیسیندا بَیانات وئریب.
چیخیشینا اؤلکهنین سون 5 ایلده ایکینجی دونیا موحاریبهسیندن (1939-1945) بو یانا ان چتین دؤورلردن کئچدیگینی سؤیلهیهرک باشلایان سوناک اینگیلیستاننین بو چتینلیکلر ایله موباریزه آپاردیغینی بیلدیریب.
بوتون اوغورلارین تملینده ایقتصادی استقرارین اولدوغونا دقت چکن سوناک، اینگیلیستان ایقتیصادینین بؤیومهیه داوام ائتدیگینی و ایقتصادی تورم دورومونون نورمالا دؤندویونو ایفاده ائتدی.
فائیض درجهلرینین آشاغی دوشدویونو و حؤکومتین پلانینین ایشه دوشدویونو بیلدیرن سوناک، حاضیردا بیر چوخ اینسان اوچون ایشلرین آسان اولمادیغینین فرقینده اولدوغونو بیلدیریب.
سوناک ایندی میللته وئریلهجک سوال "کیمه گوونیرسینیز؟" اولدوغونو وورغولایاراق، سؤزونو بئله داوام ائتدیردی:
"ایندی اینگیلیستاننین گلهجیینی سئچمک واختیدیر. الده ائتدیگیمیز ایرلیلَییشه اساسلانماق، یوخسا پلانسیز و امینلیک اولمادان بیرینجی یئره قاییتماق ایستمَییمیزه قرار وئرمک واختیدیر. من اینگیلیستان کرالی (چارلز) ایله گؤروشدوم و پارلمانین فسخ ائدیلمهسینی خواهیش ائتدیم. کرال بو طلبی قبول ائتدی و بیز جولای 4-ده عومومی سئچکیلر کئچیرهجَییک."
سوناک آنا موخالیفتدهکی ایشچی پارتیسینین بریتانیا اوچون گلهجک پلانینین اولمادیغینی ادعا ائدهرک، سئچیجیلری اؤلکه اوچون آیدین پلانی و جسارتلی حرکتی اولان بیر پارتی سئچمهیه چاغیریب.
باش ناظیر سوناک چیخیشینین سونوندا سئچکی کامپانیاسی بویونجا هر سس اوچون موباریزه آپاراجاغینی، سئچیجیلرین اعتیمادینی قازاناجاغینی و یالنیز اونون رهبرلیک ائتدییی موحافیظهکارلار پارتیسی حؤکومتینین ایقتصادی استقراری تامین ائدهجیینی مودافیعه ائتدی.