اوروپا بیرلیگی تهرانا قارشی تحریملری گئنیشلندیره‌جک

اروپا بیرلیگینین خاریجی علاقه‌لر و تهلوکه‌سیزلیک سیاستی اوزره عالی نوماینده‌سی جوزپ بورل، ایرانین ایسرائیله هوجومونا گؤره ایرانا قارشی موجود تحریملره یئنی تحریملرین علاوه‌ ائدیلمه‌سی اوچون ایشه باشلایاجاقلارینی آچیقلاییب.

اروپا بیرلیگی اؤلکه‌لرینین خاریجی ایشلر ناظیرلری ایرانین ایسرائیله ائندیردیگی هاوا هوجوملاری‌ ایله باغلی فوق‌العاده آنلاین ایجلاسدا بیر آرایا گلیب.

ایکی ساعاتلیق گؤروشدن سونرا آچیقلاما وئرن بورل، "اصرارلا ایرانین هوجوملارینا قارشی ایسرائیلین یانیندا اولدوغوموزو بیلدیریرم" دئدی.

بورل بعضی عضو اؤلکه‌لر تهرانا قارشی تحریملرین گئنیشلندیریلمه‌سینی ایستدیکلرینی و بیرلیگین دیپلوماتیک خیدمتینین بو تکلیف اوزرینده ایشه باشلایاجاغینی بیلدیریب.

جوزپ بورل بیان ائدیب کی، تکلیف ایرانین پیلوتسوز اوچوش آپاراتلارینین روسیه‌یه تداروکونون قارشیسینی آلماق مقصدی داشییان تحریملری گئنیشلندیره‌جک، راکتلرین تداروکو ده داخیل اولاجاق و همچینین ”ایرانین یاخین شرقده‌کی نوماینده‌لرینه“ چاتدیریلماسی دا بو تحریملره داخیل اولا بیلر.

غزه‌ده‌کی وضعیتین اونودولماماسی لازیم اولدوغونو وورغولایان بورل درحال و داواملی آتیش‌کسین تامین ائدیلمه‌سی، محبوسلارین آزاد ائدیلمه‌سی و اینسانی وضعیتین یاخشیلاشدیریلماسی اوچون سعیلرین گؤستریلمه‌لی اولدوغونو قید ائدیب.

ایسرائیل آوریلین 1-ده ایرانین دمشقده‌کی کونسوللوغونون بیناسینا هاوا هوجومو حیاتا کئچیریب، نتیجه‌ده ایکیسی ژنرال اولماقلا ایران اینقیلابی کئشیکچیلری اوردوسوندان 7 نفر هلاک اولوب.

ایران بیان ائتمیشدی کی، ایسرائیلین ایران کونسوللوغونا هوجوم اونون اؤلکه‌ اراضیسینه هوجوم دئمکدیر و اونلار بونا جاواب وئرجکلر.

ایسرائیل‌ده ایرانین هوجوملارینا جاواب وئرجیینی بیان ائدیب.

13 آوریلده ایران یوزلرله کامیکازه پیلوتسوز اوچوش آپاراتی، بالیستیک و قانادلی راکتلرله ایسرائیله هوجوم ائدیب و بعضی حربی هدفلرین وورولدوغونو آچیقلاییب.

ایسرائیل بیلدیریب کی، هوجوملارین اکثرییتینین قارشیسی هاوا هوجومو مودافیعه سیستملری طرفین‌دن آلینیب، لاکین بیر راکئت جنوبداکی حربی تاسیساتا دوشوب.