سودانین دارفور بؤلگهسینده اوشاقلاری دویورماق اوچون آغاج یارپاغی و چکیرتکه بئله قالمادی
بیرلشمیش میللتلر تشکیلاتی-آفریقا بیرلیگی دارفور بیرگه صولح گوجلرینین (اونامید) دارفوردان چیخاریلماسی ایله بؤلگهده قتل و تجاووز حادیثهلری آرتماغا باشلادی
سودانین باتیسینده وطنداش موحاریبهسینین حکم سوردویو دارفور بؤلگهسینده "اوشاقلار حتا یئدیکلری آغاج یارپاقلاری و چکیرتکهلری ده توکندیگی اوچون اؤلومله اوز-اوزهدیر".
دارفور سیغینماجی و قاچقین دوشرگههلرینین باش کووردیناتورو یعقوب محمد عبدالله فوری، اولوسلارآراسی یاردیملارین گلممهسی و قادینلارین تجاووزه معروض قالماق قورخوسوندان یئمک تاپماق اوچون دوشرگههلری ترک ائده بیلمدیکلری اوچون اوشاقلارین آجلیقدان اؤلمک تهلوکهسی ایله اوزلشدیگینی بیلدیریب.
گونئی دارفور ایالتینین نیالا شهریندکی کالما دوشرگهسینده یاشایان فوری، "دارفورداکی قاچقین دوشرگهلرینده یاشایان اوشاقلارین آجلیغینی دویورماق اوچون آغاج یارپاغی و چکیرتکه بئله قالمادی" دئدی.
فوری، بیرلشمیش میللتلر تشکیلاتی-آفریقا بیرلیگی دارفور بیرگه صولح گوجلرینین (اونامید) دارفوردان چیخاریلماسی ایله بؤلگهده قتل و تجاووز حادیثهلرینین آرتماغا باشلادیغینا، قادینلارین تجاووزه کیشیلرین ده اؤلدورولمهیه معروض قالماق قورخوسوندان آرتیق دوشرگهلری ترک ائده بیلمیهجیینه دیققت چکیب، بونا گؤره ده آرتیق آغاج یارپاقلاری و یا چکیرتکه توپلایا بیلمیهجکلرینی وورغولادی.
اینسانلارین آجلیقدان اؤلمهیه باشلادیغینا دیققت چکن فوری، "بیرلشمیش میللتلر تشکیلاتی آرتیق دارفوردا دئییل. اونامید گوجلرینین دارفوردان چیخماسینا قارشی چیخدیق. آنجاق نه دونیا دؤولتلری، نه اولوسلارآراسی تشکیلاتلار، نه ده اینسان حاقلاری تشکیلاتلاری بیزی دینلهمدی." دئدی.
اولوسلارآراسی توپلومو دارفورداکی قاچقین دوشرگهلرینده یاشانان تراژیک شرایطه محل قویمادیقلاری اوچون تنقید ائدن فوری، "دونیا بیزی اؤلدورنلرله باش-باشا بوراخدی، هئچ کیم یانیمیزدا اولمادی" دئدی.
سودانین دارفور بؤلگهسینده آجلیق سویهسی ایله باغلی اولوسلارآراسی و یئرلی سویهده هئچ بیر معلومات و یا حسابات یوخدور. بونونلا بئله، دونیا غذا پروگرامی مارتین 6-دا وئردیگی آچیقلامادا سوداندا تخمینن 11 آیدیر داوام ائدن موناقیشهلر سببیندن دونیادا ان بؤیوک آجلیق بحرانینین باش وئره بیلهجیی بارهده خبردارلیق ائدیب.
دونیا غذا پروگرامینین فوریهنین 5-ده آچیقلادیغی سون حساباتا گؤره، تخمینن 18 میلیون سودانلی کسکین غذا چاتیشمازلیغی یاشاییر و اونلاردان 5 میلیونو آجلیق آستاناسیندادیر.
اوردو ایله چئویک دستک گوجلرینین حربی و تهلوکهسیزلیک ایصلاحاتلاری چرچیوهسینده قارشیدورمایا دوشمهسیندن سونرا آوریلین اورتالاریندا وطنداش موحاریبهسی باشلاییب.
اؤلکه او واختدان بری طرفلر آراسیندا شیددتلی توققوشمالارا صحنه اولوب.
بیرلشمیش میللتلر تشکیلاتینین معلوماتینا گؤره، دونیانین ان بؤیوک کؤچکونلوک بحرانینین یاشاندیغی سوداندا موناقیشهلر نتیجسینده 13 میندن چوخ اینسان حیاتینی ایتیریب، 6 میلیون اینسان اؤلکه داخیلیندهکی دیگر شهرلره، 1.7 میلیون اینسان ایسه اطراف اؤلکهلره قاچیب.
ایلگیلیلی خبرلر
ایسپانیانین باش ناظیری ایستعفا وئرمهیهجگینی آچیقلاییب
ایسپانیانین باش ناظیری پدرو سانچز اؤز وظیفهسینده قالاجاغینی آچیقلاییب.