ایسراییل قسام گردان لارینین "غزه-نین قوزئیینده نظارتی ایتیردیگینی" ادعا ائتدی

ایسراییل اوردوسونون سؤزچوسو دانیل هاگاری قسام گردان لارینین"غزه-نین قوزئی ینده نظارتی ایتیردیگینی" ادعا ائتدی.

هاگاری مطبوعات کنفرانسیندا غزه زولاغینا ائدیلن هوجوم‌لارلا باغلی آچیقلاما‌لار وئریب.

او، "غزه زولاغینداکی موناقیشه‌لر اوچون اینسانی آتشکسین قاچیلماز اولدوغو" خبرلرینی رد ائده‌رک، آتشکسین اولمایاجاغینی بیلدیریب.

هاگاری "حماس"ین حربی قانادی عزالدین القسام  گردان لارینین "غزه-نین قوزئی ینده نظارتی ایتیردیگینی" ادعا ائدیب.

غزه-ده‌کی اسیرلرله باغلی دا آچیقلاما وئرن هاگاری فیلیسطین‌لی قروپ‌لارین الینده‌کی اسیرلرین سایی‌نین 239 نفر اولدوغونو قئید ائدیب.

ایسراییل اوردوسونون سؤزچوسو دانیل هاگاری اوکتبرین 7-دن بو یانا داوام ائدن قارشیدورما‌لاردا 351 ایسراییل عسگری‌نین هلاک اولدوغونو دئییب.

خاطیرلاداق کی، "حماس"ین حربی قانادی قسام گردان لاری اوکتبرین 7-سی گئجه‌سی ایسراییله قارشی "القصی طوفانی" آدلی هرطرف‌لی هوجوما کئچیب. غزه-دن ایسراییله دوغرو مین‌لرله راکت آتیلیب، سلاحلی قروپ‌لار بؤلگه‌ده‌کی یاشاییش منطقه‌لرینه داخیل اولوب. ایسراییل اوردوسو دا دؤیوش اوچاق لاری ایله غزه زولاغینا قارشی "دمیر قیلینج‌لار" عملیاتینا باشلاییب.

ایسراییل اوکتبرین 7-دن بو یانا 34-و غزه زولاغینداکی توققوشما‌لاردا اولماقلا 351-ی عسگر 1400-دن چوخ ایسراییل‌لی‌نین اؤلدوگونو، 5132 نفرین یارالاندیغینی آچیقلاییب.

غزه-ده‌کی فیلیسطین ساغلیق ناظیرلیگی‌نین معلوماتینا گؤره، ایسراییلین هوجوم‌لاری نتیجه‌سینده 4324-و اوشاق، 2823-و قادین اولماقلا 10.569 فیلیسطین‌لی هلاک اولوب، ان آزی 26.475 نفر ایسه یارالانیب.

ایسراییل قوه‌لری و یهودی کؤچکون‌لر اوردون چایی‌نین باتی ساحلینده و قدس-ده 163 فیلیسطین-لینی قتله یئتیریب.

اوکتبرین 8-دن ایسراییل اوردوسو ایله حرب الله آراسیندا گئدن قارشیدورما‌لاردا 63 حزب الله عضوو و 4 ایسراییل عسگری هلاک اولوب.