پرنس هری: افغانیستان‌دا ۲۵ نفری اؤلدوردوم
"یعنی منیم نؤمره‌م ۲۵دیر. منی قانع ائد‌ن بیر سایی دئییل اما منی اوتاندیرمیر دا"
اینگیلیس کراللیق عائله‌سیندن آیریلاراق آمریکا بیرلشمیش دؤولتلرینه یئرلشن ساسکس دوکو پرنس هری، افغانیستان‌دا حربی خیدمتی سیراسیندا ۲۵ نفری اؤلدوردوگونو و بوندان دولایی اوتانمادیغینی بیلدیردی.
«ده تلگراف» قزئتینین معلوماتینا گؤره، پرنس هری ۱۰ ژانویه‌ده ساتیشدا اولاجاق «Spare» آدلی خاطره کیتابیندا ۲۰۰۷-۲۰۰۸ و ۲۰۱۲-۲۰۱۳.جو ایللرده خیدمت ائتدیگی افغانیستان‌دا ۲۵ نفری اؤلدوردوگونو یازدی.
افغانیستان‌دا خربی خدمتیینی ائتدیگی دؤورله باغلی کیتابیندا یئر وئردیگی خاطره‌لرین‌ده، پرنس هری، چاتیشما‌نین سس کوی و قاریشیقلیغیندا اؤلدوردوگو عصیانچیلاری، «یاخشیلاری اؤلدورمه‌دن آرادان قال‌یریلان پیسلر» اولاراق گؤردوگونو قید ائتدی.
"بیرینی اینسان اولاراق گؤره‌نده اونو اؤلدورمه‌یین ایمکانسیز اولدوغونو" قید ائد‌ن پرنس هری، آنجاق اوردونون اؤزونه، "اونلاری «اؤته‌کی» اولاراق گؤرمه‌سی اوچون یاخشی شکیلده تعلیم وئردیگینی" بیلدیردی.
ساواشداعسگرلرین عموماً نئچه دوشمن اؤلدوردوکلرینی بیلمه‌دیکلرینی و تصادفی آتیش ائتدیکلرینی ایفاده ائد‌ن پرنس هری، آنجاق آپاچیلرین (هلیکوپتر) و دیز اۆستو بیلگی‌سایارلارین اولدوغو بو چاغدا، موطلق نئچه دوشمن ساواشچیسینی اؤلدوردوگونو دئیه‌بیله‌جیینی ایفاده ائتدی.
پرنس هری، کیتابیندا "بو ساییدان قورخماماق منه چوخ اؤنملی گؤروندو. یعنی منیم نؤمره‌م ۲۵دیر. منی قانع ائد‌ن بیر سایی دئییل اما منی اوتاندیرمیر دا" ایفاده‌لرینی ایشلتدی.
گاردین‌ین دوننکی خبرینه گؤره ده، پرنس هری، کیتابیندا بؤیوک قارداشی پرنس ویلیامی، اؤزونه ائتدیگی فیزیکی سالدیری ایله سوچلادی.
پرنس ویلیامین بیر دالاش سیراسیندا اونو یاخاسیندان توتوب یئره ییخدیغینی بیلدیره‌ن پرنس هری، اۆستونه دوشدوگو ایت یئمی قابینین قیریق پارچالارینین کۆریینه باتدیغینی یازدی.
باکینگهام سارایی، کیتاب‌دان پایلاشیلان بؤلوملرله باغلی ایندییه قدر هئچ بیر آچیقلاما وئرمه‌دی.
