آمریکادان تورکیه آچیقلاماسی
"بایدن یؤنتیمی اورتاق اؤنجه‌لیکلر اوزرین‌ده تورکیه ایله امکداش‌لیق ائتمه آختاریشین‌دادیر"
آمریکا بیرلشمیش دؤولتلری، "تورکیه ایله اورتاق اؤنجه‌لیکلرده امکداش‌لیق آختاریشین‌دا" اولدوغونو بیلدیردی.
گئچه‌ن هفته ایش اینسانی عثمان کاوالانین سربست بوراخیلماسی اوچون چاغیریش ائدن ائلچیلرین دونن گئری آددیم آتیب، وین آنلاشما‌سینین ۴۱.جی ماده‌سینه ایشاره ائد‌رک "ایچ ایشلرینیزه قاریشمایاجاغیق،قانونلارینیزا رعایت ائده‌جییک" توئیتلری پایلاشمالارینین آردین‌دان، بیر آچیقلاما دا آمریکادان گلدی.
آمریکا خاریجی ایشلر باخانلیغی سؤزچوسو ند پرایس، گونده‌لیک مطبوعات توپلانتیسیندا تورکیه ایله امکداش‌لیق ائتمه‌یه داوام ائد‌جکلرینی وورغولایاراق بئله دانیشدی:
"بایدن یؤنتیمی اورتاق اؤنجه‌لیکلر اوزرین‌ده تورکیه ایله امکداش‌لیق ائتمه آختاریشین‌دادیر و بیر ناتو متفیقیمیز اولاراق هر هانسی بیر آنلاشیلمازلیغین حلی اوچون دیالوگ یولونو قوللانماغا داوام ائدجییک. گله‌جگه باخمانین ان یاخشی یولونون، اورتاق چیخار ساحه‌لرین‌ده امکداش‌لیق ائتمک اولدوغونا اینانیریق و تورکیه ایله بیر چوخ اورتاق چیخارامیز اولدوغونو بیلیریک".
پرایس، آمریکانین آنکارا ائلچیسی دیوید ساترفیلدین هله ده وظیفه‌سینه داوام ائتدیگینی، جمهورباشقانی رجب طیب اردوغانین سون آچیقلامالارینی گؤردوکلرینی و حقوقون اوستونلویو ایله اینسان حاقلارینا سایغی قونوسونو کوره‌سل معنادا دیله گتیرمه‌یه داوام ائد‌جکلرینی ایفاده ائتدی.
آمریکا‌لی سؤزچوسو بونلاری قید ائتدی:
"۱۸ اکتبردا اورتایا قویدوغوموز (کاوالانین سربست بوراخیلماسی) آچیقلاماسینین وین آنلاشما‌سینین ۴۱.جی ماده‌سی ایله توتارلی اولدوغونو دیله گتیریریک. قلوبال اؤلچک‌ده اینسان حاقلارینا حؤرمت اوچون حقوقون اوستونلویونو یایماغا اولان باغلیلیغیمیزی تصدیق ائدیریک و تورکیه ایله وین آنلاشما‌سینین ۴۱.جی ماده‌سینه اویغون شکیل‌ده دیالوگوموزو داوام ائتدیرمه‌یه داوام ائدجییک".
