سریلانکا سوسیال مدیا قوروم‌لارینا قاداغا قویدو

سریلانکا-دا حکومت 21 آوریل ده تؤره‌دیلن ترور حادثه‌لرین‌دن، 12 می دا ایسه اؤلکه‌نین بیر نئچه مسجید و مسلمان‌لارا عایید دوکان‌لارینا ائدیلن هوجوم‌لاردان سونرا سوسیال مدیا پلاتفورما‌لارینا یئنی‌دن موقتی قاداغا قویوب.

حکومتین اینفورماسیون شعبه‌سیندن بیلدیریلیب کی، سریلانکانین باتی سینداکی ساحل شهری چیلاو‌داکی (Chilaw) مسجیدلر و مسلمان‌لارا عایید دوکان‌لارا داش‌لارلا هوجوم ائدیلمه‌سیندن سونرا اؤلکه‌دکی بوتون سوسیال مدیا قورغولاری‌نین ایستیفاده‌سی موقتی اولا‌راق باغلانیلیب. آچیقلامادا بو ایشین "فیسبوک" و بنزر سوسیال مدیا صحیفه‌لرینده تهدید ائدیجی مئساژلارین قارشی‌سینی آلماق اوچون ائدیلدیگی یازیلیب.

بو آرادا اؤلکه‌نین بعضی بولگه لرینده 12 می ده ائدیلن "کوچه‌یه چیخما یاساغی" آرا‌دان قالدیریلیب.

خاطیرلاداق کی، سریلانکا-دا 21 آوریل ده خریستیان‌لارین مقدس پاسخا آیینی زامانی کوچیکاده (Kochchikade) شهرین‌دکی سانکت آنتونی (St-Anthonys)، کاتانا‌داکی St. Sebastian و باتیکالوداکی مریم آنا کیلسه‌لری ایله پایتاخت کلمبو-داکی بئش اولدوزلو هتل لره بومبا‌لی هوجوم‌لار ائدیلمیشدی. بو حادثه‌لردن سونرا پایتاخت کلمبونون شهراطرافی قصبه‌لری Dehiwala -داکی قوناق ائوی و Dematogoda-داکی اوست کئچید یاخینلیغیندا پارتلاییش‌لار تؤردیلمیشدی. رسمی‌لر هوجوم‌لاردا 253 نفرین حیاتینی ایتیردیگینی آچیقلامیشدی.