برگزیت-ین رد ائدیلمه سینه اعتراضلار
آوروپا بیرلیگی کمیسیونون صدری یان کلود یونکر "برگزیت" موقاویلهسینین اینگیلتره پارلامئنتینده رد ائدیلمهسیندن سونرا: "اینگیلترهنین ان قیسا زاماندا نیتینی آچیق شکیلده اورتایا قویماسینی طلب ائدیرم" ایفادهسینی ایشلتدی.
![برگزیت-ین رد ائدیلمه سینه اعتراضلار](http://cdn.trt.net.tr/images/xlarge/rectangle/4c49/953a/1078/5c347a61a130b.jpg?time=1719179948)
آوروپا بیرلیگی کمیسیونون صدری ژان کلود یونکر بؤیوک بریتانیانین باش ناظیری ترزا می ین آوروپا بیرلیگی ایله "برگزیت" موقاویلهسینین اینگیلتره پارلامئنتینده رد ائدیلمهسیندن سونرا: "اینگیلترهنین ان قیسا زاماندا نیتینی آچیق شکیلده اورتایا قویماسینی طلب ائدیرم" ایفادهسینی ایشلتدی.
یونکر وئردیگی یازیلی آچیقلامادا اؤتن گون آخشام پارلامئنتین آلت قانادی اولان عوام مجلیسینده کئچیریلن سس وئرمهنین نتیجهسینه گؤره تأسف حیسی کئچیردیگینی وورغولایاراق، آوروپا بیرلیگی-نین "برگزیت" موقاویلهسینین سسوئرمه پروسه سینی داوام ائتدیرجگینی بیلدیردی.
موجود "برگزیت" موقاویلهسینین مومکون اولان ان یاخشی موقاویله اولدوغونو قئید ائدن یونکر: " اینگیلترهنین آوروپا بیرلیگیندن راضیلاشدیریلمیش شکیلده آیریلماسینی تامین ائتمهین یئگانه یولو بودور" دئدی.
آوروپا بیرلیگی شوراسینین صدری دونالد توسک ایسه، سوسیال مئدیا حسابیندان پایلاشدیغی مئساژیندا: "اگر راضیلیغا گلمک مومکون دئییلسه و کیمسه موقاویلهسیز آیریلماق ایستمیرسه، او زامان یگانه حلین نه اولدوغونو دئمهیه کیم جسارت ائدهجک؟" دئیه قئید ائتدی.
فرانسا پرزیدنتی امانوئل ماکرون ایسه اینگیلترهنین بؤیوک احتیماللا، آوروپا بیرلیگیندن موقاویله ایله باغلی علاوه مودت ایستهیهجگینی بیلدیردی.
ماکرون قاتیلدیغی بیر ایجلاسدا اینگیلتره پارلامئنتینین "برگزیت" موقاویلهسینی قبول ائتمهمهسی ایله باغلی فیکیر بیلدیردی.
سس وئرمهنین رد ائدیلمهسیندن سونرا اوچ سناریونون حیاتا کئچیریله بیله جگینی قئید ائدن ماکرون بیرینجی سناریو برگزیت موقاویلهسی لغو اولدوغو ، بو وضعیت ده اودوزان طرفین اینگیلتره اولاجاغینی سؤیلهدی.
ماکرون ایکینجی سناریونون بریتانیانین آوروپا بیرلیگیندن موقاویله ایله باغلی یئنی طلبلر ایرهلی سورمهسی شکلینده اولا بیله جگینی ایفاده ائدهرک، موقاویلهنین تکرار موذاکیرهیه چیخاریلا بیلینمهیهجگینی وورغولادی.
اوچونجو سناریویا اساساً اینگیلترهنین موقاویله ایله علاقهدار آوروپا بیرلیگیندن علاوه مودت ایستهیه جگینی بیلدیرن ماکرون: "بلکه باشقا بیر یول تاپماق اوچون آوروپا پارلامئنتی سئچکیلرینه گیرهجکلر. بو ایسه بؤیوک بیر غیری-معینلیک و ناراحاتلیق یاراداجاق" دئدی.
آلمانیا باش ناظیرینین معاوینی و مالیه ناظیری اولاف شولتز برگزیت موقاویلهسینین بریتانیا پارلامئنتی طرفیندن رد ائدیلمهسیله باغلی: " بونا یاخشی حاضیرلاشمیشیق، لاکین سرت بیر "برگزیت" آوروپا بیرلیگی و بؤیوک بریتانیا اوچون ان آز جاذبه دار اولان بیر آلترناتیو اولاجاق" دئدی.