هاوا سالدیریلارینی دا سونلاندیراجاق
پنتاگون، چکیلمه پروسه‌سینه دایر بو مرحله‌ده یئنی دگرلندیرمه ائدیلمه‌یه‌جگینی بیلدیردی
آمریکا بیرلشمیش دؤولتلرینین سوریه‌دن عسگرلرینی چکمه قراری ایله بیرلیک‌ده، ترور هؤرگوتو داعشه قارشی هاوا سالدیریلارینی دا سونلاندیراجاغی ادعا ائدیلدی.
رویترز خبر آژانسینا آچیقلاما وئره‌ن یوکسک سویه‌لی آمریکالی یئتکیلیلر، باشقان دونالد ترامپین سوریه قرارینا دایر دانیشدی.
آمریکانین سوریه‌ده هاوا سالدیریلارینی دا سونلاندیراجاغینی قید ائد‌ن یئتکیلیلر،
"ترامپین عسگرلری چکمه قراری هاوا سالدیریلارینین دا سونلاناجاغینا ایشاره ائدیر" یورومونو وئردی.
مؤوضوع ایله باغلی سواللارا جاواب وئرمک‌دن چکینن آمریکا ساوونما باخانلیغی (پنتاگون)، چکیلمه پروسه‌سینه دایر بو مرحله‌ده یئنی دگرلندیرمه ائدیلمه‌یه‌جگینی بیلدیردی.
آمریکا پرزیدنتی دونالد ترامپ، اؤنجه‌کی گون سوسیال پایلاشیم سایتی تویتر حسابین‌دان وئردیگی آچیقلامادا،
"باشقانلیغیم دؤورون‌ده سوریه‌ده اولماغیمیزین تک سببی اولان داعشی مغلوب ائتدیک" ایفاده‌سینی ایشلتمیشدی.
آغ ائو سؤزچوسو سارا سندرز ده وئردیگی آچیقلامادا، "داعش ایله مباریزه‌نین یئنی مرحله‌سینه گیرمکله برابر، آمریکا عسگرلرینی اؤلکه‌یه گئری چکمه‌یه باشلادیق" معلوماتینی وئرمیشدی.
آمریکا مئدیاسینین دیش ایشلری مقاملارینا دایاندیردیغی خبرلرده ایسه خاریجی ایشلر باخانلیغینین سوریه‌ده‌کی بوتون پرسنلینی ۲۴ ساعات ایچین‌ده چکه‌جگی، آمریکانین سوریه‌ده‌کی عسگرلرینین ده ۶۰ ایله ۱۰۰ گون ایچین‌ده اؤلکه‌دن چکیله‌جگی ادعا ائدیلمیشدی.
