تهران ذیروه‌سی‌نین دونیا مطبوعاتینداکی عکس-صداسی
تورکیه پرزیدنتی رجب طیب اردوغانین سوریه-نین ادلیب شهری ایله علاقه‌دار "اینسانی بحران خبردارلیغی" دونیا مطبوعاتیندا گئنیش عکس-صدا تاپدی.
تورکیه پرزیدنتی رجب طیب اردوغانین سوریه-نین ادلیب شهری ایله علاقه‌دار "اینسانی بحران خبردارلیغی" دونیا مطبوعاتیندا گئنیش عکس-صدا تاپدی.
سپتامبرین 7-ده ایرانین پایتاختی تهران-دا تورکیه پرزیدنتی رجب طیب اردوغانین: "ادلیبین قان گؤلونه چئوریلمه‌سینی ایستمیریک. آتشکه‌سه دوغرو آددیم آتیلماسی فایدا‌لی اولار" سؤزلری تورکیه -ایران-روسیا اوچ طرف‌لی ذیروه گؤروشونه مؤهور ووردو.
تورکیه‌نین اینسانی موناسیبتی هم غرب، هم ده عرب مطبوعاتیندا گئنیش شکیلده عکس اولوندو.
امریکانین واشینگتن پست قزئتی پرزیدنت اردوغانین: "ادلیبه هوجوم فلاکتله نتیجه لنیر" سؤزلرینه یئر وئردی.
اینگیلتره‌نین "رویترز" خبر آژانسی تورکیه پرزیدنتی‌نین: "اؤلوم‌لری کناردان دوروب ایزله‌مه‌یه‌جییک" بیاناتینی مانشئته چیخاردی، بی بی سی تلویزیونوندا "ادلیبین قان گؤلو اولماسینی ایستمیریک" آچیقلاماسینی سسلندیردی.
اینگیلتره‌نین Sky News تلویزیون کانا‌لی ادلیبده باش وئره بیله‌جک‌لردن چوخ ناراحات اولان اؤلکه‌لردن بیری‌نین تورکیه اولدوغونو وورغولادی.
تورکیه‌نین بو آنا قدر میلیون‌لارلا قاچقینی قبول ائتدیگی خاطیرلادیلان خبرده تورکیه‌نین ادلیب‌دن گله بیله‌جک یئنی بیر دالغانی ایسته‌مه‌دیگی وورغولاندی.
فرانساننین لوموند قزئتی "تهران ذیروه‌سی‌نین اوغورسوزلوغون‌دان سونرا ادلیبده گئری ساییم باشلادی" ایفاده‌سینی ایشلتدی.
آلمانیانین "Deutschlandfunk" قزئتی پرزیدنت اردوغانین آتشکس ایسته‌دیگی و سوریه رژیمی‌نین ادلیبه هوجوم ائتمه‌سی حالیندا بولگه نین قان گؤلونه چئوریله‌جگی باره‌ده خبردارلیق ائتدیگینی بیلدیردی.
هولندین دؤولت یاییم قورومو نوس دا، ایران ایله روسیانین ادلیبی فتح ائتمک اوچون حربی عملیاتا قاپی‌لاری آچیق قویدوغونو، تورکیه‌نین ایسه آتشکس ایسته‌دیگینی بیلدیردی.
روسیا یاییم اورقانی ایسپوتنیک ایسه، اردوغانین: "مقصدیمیز ادلیب مسئله‌سینی آستانا روحونا اویغون بیر شکیلده دینج واسیطه‌لرله حل ائتمک‌دیر" سؤزلرینه یئر وئردی.
عرب مئدیاسی دا اردوغانین اینسانی بحرانلا باغلی خبردارلیغینی اؤنه چیخاردی.
قطر مرکزلی "الجزیره " تلویزیونو پرزیدنت اردوغانین: "ادلیبده الیمیز- قولوموز باغلی دایانمایاجاغیق" سؤزلرینی باش‌لیقدا سسلندیردی.
عراق-دا یاییم‌لانان دؤولت قزئتی "صاباح" آنکارانین سیاسی و جوغرافی ثابت‌لیک برقرار اولانا قدر سعی لرینی داوام ائتدیرجگینی بیلدیردی.
لبنان مرکزلی "جمهوریت" قزئتی ده پرزیدنت اردوغانین یئنی بیر کؤچ دالغاسی باره‌ده خبردارلیغیندان بحث ائتدی.
