"ایران ایستهسه کسینلیکله گؤروشهریک"
دونالد ترامپ، ایران پرزیدنتی روحانی ایله گؤروشمهیه اؤن شرطی اولمادیغینی دا قید ائتدی
!["ایران ایستهسه کسینلیکله گؤروشهریک"](http://cdn.trt.net.tr/images/xlarge/rectangle/a654/b001/d97e/5b584a5a217ae.jpg?time=1718834632)
آمریکا پرزیدنتی دونالد ترامپ، ایران پرزیدنتی حسن روحانی ایله اؤن شرطسیز گؤروشمهیه حاضر اولدوغونو آچیقلادی.
اؤلکهسینه رسمی سفرده اولان ایتالیا باشباخانی جوزپه کونتهنی آغ ائوده قارشیلایان ترامپ، داها سونرا، قوناغویلا اورتاق مطبوعات کنفرانسی دوزنلهدی.
بوراداکی دانیشماسیندا ایران مسئلهسینه توخونان ترامپ، روحانی ایله گؤروشهجیینی دیله گتیرهرک،
"ایران ایستهسه کسینلیکله گؤروشهریک" دئدی.
ترامپ، هامی ایله گؤروشهجیینی ایفاده ائدرک،
"دیگر اینسانلارلا دانیشماقدا پروبلئم یوخدور. اؤزللیکله بو اینسانلارلا محتمل بیر ساواشا گیرهجیین، اؤلوملرین اولابیلهجیی حاللاردا، گؤروشرسن. بوندا بیر پروبلئم یوخدور. قوزئی کره لیدئری ایله ده گؤروشدوم" دئیه دانیشدی.
دونالد ترامپ، ایران پرزیدنتی روحانی ایله گؤروشمهیه اؤن شرطی اولمادیغینی دا قید ائتدی.
ترامپ، می آییندا، ۱۴ جولای ۲۰۱۵ده اتریشین باشکندی وینده پ۵+۱ (آمریکا، چین، روسیا، اینگیلتره، فرانسا و آلمانیا) ایله ایران آراسیندا ایمضالانان و ۱۶ ژانویه ۲۰۱۶دا قوهیه مینهن قابشاملی اورتاق فعالیت پلانی (برجام) آدلاندیریلان نوکلئر آنلاشمادان چکیلدیکلرینی و ایرانا قارشی تحریملرین قوهیه قویولاجاغینی بیلدیرمیشدی.
ترامپ رهبرلیگی، متفیقلرینی، ایراندان نفت آلیشینی نوامبر آیینا قدر صیفیرا ائندیرمهیه مجبور ائدیر.