یونانیستان، بولغاریستان، صربیستان و رومانی دؤردلو ایجلاس
کئچیریلن ایجلاسدا، بالکانلارداکی حادثهلر، بؤلگه سل ثابتلیک، قاچقین مسئلهسی و غربی بالکان اؤلکهلرینین آوروپا بیرلیگی پرسپکتیوی ایله باغلی مسئلهلر موذاکیره اولونوب
یونانیستان، بولغاریستان، صربیستان و رومانی نین لیدرلری، یونانیستانین سلانیک شهریندکی دؤردلو ایجلاسدا گؤروشدو.
یونانیستان باش ناظیری آلکسیس چیپراس، صربیستان پرزیدنتی آلکساندر ووجیج، رومانی باش ناظیری ویوریکا دانسیلا و بولغاریستان باش ناظیری بویکو بوریسووون قاتیلیمی ایله کئچیریلن ایجلاسدا، بالکانلارداکی حادثهلر، بؤلگه سل ثابتلیک، قاچقین مسئلهسی و غربی بالکان اؤلکهلرینین آوروپا بیرلیگی پرسپکتیوی ایله باغلی مسئلهلر موذاکیره اولونوب.
ایجلاس چرچیوهسینده یونانیستان، بولغاریستان، صربیستان و رومانی نین آلت یاپی و نقلیات ناظیرلری ده بیر آرایا گلهرک نقلیاتلا باغلی بؤلگه سل مسئلهلری موذاکیره ائدیب.
لیدرلر، دؤردونجو دفعه بیر آرایا گلدیکلری توپلانتینین سونوندا بیرگه مطبوعات کونفرانسی کئچیریب.
یونانیستان باش ناظیری چیپراس، ائتدیگی آچیقلامادا، دؤردلو ایجلاس توپلانتیسینین بؤلگهده اؤنملی پروسهلرین باش وئردیگی بیر دؤورده حیاتا کئچیریلدیگینی قئید ائدهرک، "سون زاماندا بالکانلاردا مثبت دینامیکین یارانماغا باشلادیغینی" سؤیلهدی.
چیپراس، یونانیستان و مقدونیه آراسیندا آد پروبلئمینین حلّینه یؤنهلیک ایمضالانان آنلاشمانین اؤنملی بیر مسئلهنین حلّی اوچون اساس یاراتدیغینی، بوتون بؤلگهیه یئنی بیر پرسپکتیو وئردیگینی ایفاده ائدهرک،
"بو گون مثبت بیر دؤور سونا چاتیر و داها اومیدلی یئنی بیر دؤور باشلاییر." دئدی.
صربیستان پرزیدنتی ووجیج ده بئله توپلانتیلارین صربیستان باخیمیندان بؤیوک اهمیت داشیدیغینی ایفاده ائدهرک، اؤلکهسینین آوروپا بیرلیگی عضولوگونه دستک اوچون یونانیستان، بولغاریستان و رومانی یه تشککور ائدیب.
ووجیج،
"بو تدبیرلر دؤرد اؤلکه داها یاخینلاشدیراراق ایقتیصادی فایدا گتیرهجک. بلگراد-اوسکوپ-سلانیک دمیر یولو خطی بیزیم اوچون چوخ اهمیتلی. اونلارلا ایل گؤره شئیی ائدجیک." دئدی.
بولغاریستان باش ناظیری بوریسوو دا اؤلکهسینین آوروپا بیرلیگی صدرلیگی وظیفهسینی اوغورلا یئرینه یئتیردیگینی ایفاده ائدهرک، بولغاریستانین، صربیستاننین آوروپا بیرلیگی عضولوگونه دستک وئردیگینی آنجاق لازیمی معیارلارین ده یئرینه یئتیریلمهسی لازیم اولدوغونو قئید ائدیب.
بولغاریستان، صربیستان، یونانیستان و رومانی آراسینداکی نقلیات شبکهسی ایله باغلی آلت یاپی اینکیشاف ائتدیریلمهسینین اهمیتینه توخونان بوریسوو، یئنی یوللار تیکیلدیغینده سرحدلردکی ییغیلمالارین آزالاجاغینی و اؤلکهلر آراسیندا تیجارتین اینکیشاف ائدجگینی وورغولاییب.
رومانی باش ناظیری دانسیلا دا ایجلاسین دؤرد اؤلکه اوچون فایدالی نتیجهلری اولدوغونو ایفاده ائدهرک، "یونانیستانین گلیشمه ساحهسینده بؤلگه ده اؤنملی رول اوینایان اؤلکه اولدوغونو" دئییب.
توپلانتیلاردا آلینان قرارلارین حیاتا کئچیریلمهسی اوچون دؤرد اؤلکهنین داها تئز-تئز گؤروشمهسی لازیم اولدوغونو بیلدیرن دانسیلا، اؤلکهسینین صربیستاننین آوروپا بیرلیگی عضولوگونه تام دستک وئردیگینی قئید ائدیب.