روسیا وطنداشلارینین سس وئرمه پروسه‌سی مرسین‌ده کئچیریلیب

روسیا پرزیدنتلیک سئچیم‌لری چرچیوه‌سینده تورکیه‌ده ایلک صاندیق‌لار دونن قورولوب و ایلک سس وئرمه پروسه‌سی مرسین‌ده کئچیریلیب.

روسیانین آنکارا سفیرلیگین‌دن وئریلن معلوماتا گؤره 18 مارس بازار گونو کئچیریله‌جک اولان روسیا پرزیدنتلیک سئچیم‌لری چرچیوه‌سینده تورکیه‌ده دونن ایلک صاندیق‌لار مرسین‌ده یارادیلیب.

سس وئرمه عملیات‌لاری، دونن 09.00 ایله 19.00 ساعت‌لاری آراسیندا کئچیریلیب.

سس وئرن‌لر آراسیندا تورکیه‌نین ایلک نوکلئر گوج سانترالی‌نین تیکینتی‌سی اوچون اؤلکه‌یه گلن روس وطنداش‌لاری ایله مرسین و آدانادا داوام‌لی اولا‌راق یاشایان روسیا وطنداش‌لاری اولدوغو بیلدیریلرکن ایلک دفعه سس وئرن روس وطنداش‌لارینا خاطیره اشیا‌لار داغیدیلدیغی بیلدیریلیب.

سئچیم‌لرین، روس قانون‌لارینا اویغون شکیلده حیاتا کئچیریلدیگی قید ائدیلیب.

تورکیه‌دکی روس دیپلوماتیک نماینده‌لیک‌لرینه اوزاق مسافه‌ده یاشایان روس سئچیجی‌لر اوچون قارشی‌داکی ایکی هفته عرضینده تورکیه‌نین موختلیف  اوستان و شهرینده صاندیق‌لار قورولا‌جاق.

بو چرچیوه‌ده کوجائلی داریجا اوستانیندا 9 مارس‌دا 17.00-21.00 ساعت‌لاری آراسیندا، آنتالیانین ساحه‌یه شهرینده 10 مارسدا 10.00-18.00 ساعت‌لاری آراسیندا، آنتالیانین کمر شهرینده 10 مارسدا 10.00-16.00 ساعت‌لاری آراسیندا، بورسادا 10-11 مارسدا 08.00-18.00 ساعت‌لاری آراسیندا، اسکیشهیرده 12 مارسدا 09.00-19.00 ساعت‌لاری آراسیندا و ایزمیرده 14-15 مارسدا 09.00-19.00 ساعت‌لاری آراسیندا روس وطنداش‌لارینا رای ایستیفاده ائتمه ایمکانی تقدیم اولونا‌جاق.

تورکیه‌ده یاشایان و موقتی اولا‌راق تورکیه‌ده یئرلشن روس وطنداش‌لاری، سئچیم گونو اولان 18 مارسدا ساعت 08:00دن 20:00یه قدر روسیا آنکارا سفیرلیگی ایله آنتالیا، ایستانبول و ترابزون باش کونسوللوق‌لاریندا قورولا‌جاق اولان منطقه‌ده سس وئره‌جک.

روسیا مرکزی سئچیم کومیسیونونون معلومات‌لارینا گؤره روسیا پرزیدنت سئچیم‌لری اوچون روسیا کناردا 145 اؤلکه‌ده 385 صاندیغی قورولا‌جاق.