مکزیک ایله آمریکا آراسینداکی دیوارین مالیلشدیریلمهسی بحثی بؤیوگور
31 ژانویهده آمریکانین پایتاختی واشینگتوندا ایکی لیدری بیر آرایا گتیرهجک توپلانتینین لغو ائدیله بیلهجگی آچیقلاماسی قارشیسیندا مکزیک رهبرلیگی "چاشمیشا دؤندو
![مکزیک ایله آمریکا آراسینداکی دیوارین مالیلشدیریلمهسی بحثی بؤیوگور](http://cdn.trt.net.tr/images/xlarge/rectangle/eb5a/96eb/fefa/5882feac5013b.jpg?time=1718880416)
مکزیک مرزینه دیوار اؤرولمسینی نظرده توتان قرارنامهیه ایمضا آتان آمریکا پرزیدنتی دونالد ترامپ ایله مکزیک رهبرلیگی آراسینداکی "دیوارین مالیلشدیریلمهسی" بحثی بؤیوگور.
دیوارین مالیلشدیریلمهسی ایله باغلی قارشیلیقلی آچیقلامالارین آردیندان ترامپ، اجتماعی مئدیا حسابی توییتردن ائتدیگی پایلاشیمدا،
"اگر مکزیک، عاجیل احتیاج اولان بو دیوارین پولونو اؤدمک ایستمیرسه بلکه ده اؤنوموزدکی توپلانتینی لغو ائتمک داها یاخشی اولار." ایفادهسینی ایستیفاده ائتدی.
31 ژانویهده آمریکانین پایتاختی واشینگتوندا ایکی لیدری بیر آرایا گتیرهجک توپلانتینین لغو ائدیله بیلهجگی آچیقلاماسی قارشیسیندا مکزیک رهبرلیگی "چاشمیشا دؤندو".
مکزیک پرزیدنتی انریگه پنیا نیتو دا بیر آچیقلاما ائدهرک،
"آمریکا پرزیدنتی ایله اؤنوموزدکی چرشنبه آخشامی گونو کئچیریلمهسی پلانلاشدیریلان توپلانتییا قاتیلمایاجاغیمی بو سحر آغ ائوه چاتدیردیق." دئدی و ایکی اؤلکه آراسینداکی ایش بیرلیگینین سورمهسی لازیم اولدوغونا ایناندیغینی وورغولادی.
نیتونون بو آچیقلاماسینا فیلادلفیادان جواب وئرن ترامپ،
"مکزیک دولت باشقانی ایله من، اؤنوموزدکی هفته کئچیریلمهسی پلانلاشدیریلان توپلانتینین لغوی موضوعسوندا راضی قالدیق. آمریکایا حؤرمتلی داورانمایان مکزیک ایله بو جور بیر توپلانتی ثمرهسیز اولاردی." آچیقلاماسی ائتدی.
مکزیک مالی ناظیری خوزه آنتونیو مید ایسه،
"دئیهسن دیپلوماسی توییتر واسطهسیله ائدیلمز." دئیهرک ترامپین دیوارلا باغلی پروسهنی اجتماعی مئدیا حسابی اوزریندن ایداره ائتمهسینی تنقید ائتدی.
دیگر طرفدن، آغ ائو سؤزچوسو شان اسپایسر، آمریکا- مکزیک مرزینه هؤرولمهسی پلانلاشدیریلان دیوارین خرجینین قارشیلانماسی اوچون، ترامپین بو اؤلکهدن ایدخال ائدیلن بوتون ماللارا یوزده 20 وئرگی قویماغی پلانلاشدیردیغینی سؤیلهدی.
اسپایسر، سؤز موضوعسو پلانین ترامپین سئچیم کامپانیاسی اثناسیندا وعد ائتدیگی وئرگی اصلاحاتینین بیر بؤلومو اولاجاغینی ایفاده ائتدی.